भांगरभूंय | प्रतिनिधी
आयज रॅड, जाल्यार फाल्यां ऑरेंज अलर्ट
भांगरभूंय । प्रतिनिधी
पणजी : बांगालच्या उपसागरांत फुडल्या 24 वरांत उण्या दाबाचो पट्टो तयार जावपाची शक्यताय आसा. अरबी दर्यांत तयार जाल्लो टर्फ आनी हेर वातावरणीय कारणांक लागून हवामान खात्यान 24 जुलयाक अतीउटंगाराच्या पावसाची शक्यताय उक्तायल्या. जाल्यार 25 जुलयाक ऑरेंज अलर्ट जारी केला.
खात्यान 26 ते 29 जुलय मेरेन मध्यम स्वरपाच्या पावसाची शक्यताय उक्तायल्या आनी चार दिसां खातीर पावसाचो यलो अलर्ट जारी केला.
पावसान बुधवारा गोंयाक झोड दिलो. खूब कडेन वादळी वाऱ्या सयत उटंगाराच्या पावसाची नोंद जाली. हाका लागून पडझड जावन लुकसाणीच्या घडणुकांची नोंद जाली. रस्त्यांचेर उदक सांचून उरिल्ल्यान येरादारी आडावली. गोंयांत 24 वरांत सरासरी 3.41 इंच पावसाची मोंद जाली. हे मजगतीं, दाबोळे 4.51 इंच, मुरगांवां 4.22 इंच, पणजे 4.12 इंच, पोरणें गोंया 3.87 इंच, काणकोणां 3.77 इंच, फोंड्यां 3.66 इंच जाल्यार मडगांवां 3.82 इंच पावसाची नोंद जाली. बुधवारा पणजे चडांत चड 28.5 अंश जाल्यार उण्यांत उणें 23.4 अंश सेल्सियस तापमानाची नोंद जाली. मुरगांवां चडांत चड तापमान 26.4 अंश जाल्यार उण्यांत उणें 23.5 अंश सेल्सियस आशिल्लें. फुडले स दीस गोंयांतलें चडांत चड तापमान 27 ते 28 अंश आनी उण्यांत उणें 24 ते 25 अंश सेल्सियस मेरेन आसपाची शक्यताय आसा. पावसाक लागून अंजुणें धरणांतल्या उदकाच्या सांठ्यात वाड जाता. बुधवारा सांजे मेरेन अंजुणें धरणांत 81 टक्के उदकाचो सांठो आशिल्लो. जाल्यार चापोली 100 टक्के, साळावली 110 टक्के, पंचवाडी 102 टक्के जाल्यार गवाणें धरणांत 100 टक्के उदकाचो सांठो बाकी आशिल्लो.
धारबांदोड्यां पावस शेंकड्याच्या हुमऱ्यार
गोंयांत 1 जून ते 23 जुलय मेरेन सरासरी 70.48 इंच पावसाची नोंद जाल्या. हे मजगतीं, धारबांदोड्यां 97 इंच पावसाची नोंद जाल्या. सांग्यार 90.74, वाळपय 84.06 इंच, केप्यां 83.03 इंच, फोंड्यां 78.53 इंच, सांखळे 70.74 जाल्यार पोरणें गोंया 68.59 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
