भांगरभूंय | प्रतिनिधी
पणजीः एका काळार पब्लीक कॉल ऑफीस (पीसीओ) हें फोना वरवीं संवाद सादपाचें म्हत्वाचें साधन आशिल्लें. लॅण्डलायनी वरवीं फोन करचे खातीर पीसीओंत गर्दी जाताली. मात कालांतरान लॅण्डसायनची सुवात मोबायल फोनान घेतली. फाटल्या 20 वर्सांत गोंया सयत पुराय देशांत मोबायल धारकांची संख्या गतीन वाडटा. हाका लागून पीसीओची संख्या लेगीत उणी जाली. अशें आसलें तरीय गोंयांत आयज लेगीत 75 पीसीओ चलतात.
मोबायल 4 जी, 5 जी तंत्रज्ञानाच्या काळांत देशांत 16 हजार 958 पब्लीक कॉल ऑफीस (पीसीओ) आयज लेगीत चालू आसात. तातूंतले 75 पीसीओ गोंयांत आसात आनी ते समाधान दिवपी काम करतात, अशी म्हायती मेळ्ळ्या.
अदीक म्हायती प्रमाण गोंयांतल्या गांवगिऱ्या वाठारांत 16 जाल्यार शार वाठारांत 59 पीसीओ चालू आसात. पुराय देशांत गांवगिऱ्या वाठारांत 1519 जाल्यार शार वाठारांत 15 हजार 439 पीसीओ आसात. राज्यां प्रमाण महाराष्ट्राच्या शार वाठारांत आयज लेगीत 4314 पीसीओ आसात. केरळाच्या गांवगिऱ्या वाठारांत557 पीसीओ आसात. झारखंड, ओडिशाच्या शार वा गांवगिऱ्या वाठारांत एकूय पीसीओ ना. तेचवरी मिझोरम, अरुणाचल प्रदेश, नागालॅण्ड, सिक्कीम ह्या राज्यांच्या शार वा गांवगिर्या वाटारांत एकूय पीसीओ ना. केंद्रशासीत प्रदेशां मदीं दिल्लींत सगळ्यांत चड 891 पीसीओ आसात. फाटल्या तीन वर्सांत देशभरांतले सुमार 45 हजार पीसीओ बंद जाल्यात. मोबायल फोनाचो वाडटो वापर, ह्या मळार आयिल्लें नवें तंत्रज्ञान, सवाय भितर मोबायल टेरीफ प्लॅन ह्या कारणां खातीर पीसीओचो वापर उणो जाल्ल्याचें कळटां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
