भांगरभूंय | प्रतिनिधी
पणजी: गोंयांत आयच्यान ’कार्नावल २०२६’ सुरू जाता. जाल्यार दुसरे वटेन (शेनवार-आयतार) मोपाच्या मनोहर आंतरराष्ट्रीय विमानतळार ’F4 इंडियन चॅम्पियनशीप’ ही आंतरराष्ट्रीय दर्जाची मोटरस्पोर्ट्स सर्त जातली. ह्या दोनूय आयोजनांक लागून गोंयांत हजारांनी पर्यटक आयल्यात.
आयज, १३ फेब्रुवारी सावन कार्नवालाक उमेदीन सुरवात जातली. पर्यटन विभागान जाहीर केल्ल्या कार्यावळीं प्रमाण अंदूंच्या महोत्सवांत परंपरीक चित्ररथ मिरवणूक (फ्लोट परेड) आनी गोंयच्या समृद्ध सांस्कृतीक दायजाचेर विशेश लक्ष दिलां. १३ ते १७ फेब्रुवारी हे पांच दीस गोंयांत विवीध सुवातांचेर कार्नावल जातलो. ह्या महोत्सवाक लोक आनी पर्यटक वांटेकार जातले. तशी प्रशासनानूय नेटान तयारी केल्या.
मजगतीं, मोपा एक नावो इतिहास रचतले. येवपी १४ आणि १५ फेब्रुवारीक मनोहर आंतरराष्ट्रीय विमानतळाच्या विशेश रेसिंग सर्किटाचेर ‘F4 इंडियन चॅम्पियनशिप’ रंगतली. मुख्यमंत्री प्रमोद सावंत हांणी बिरेस्तारा हे आंतरराष्ट्रीय सर्तीचे तयारेचो आनी तात्रीक सज्जतेचो आढावो घेतलो. ‘रेसिंग प्रमोशन्स प्रायव्हेट लिमिटेड’ ह्या आयोजकां सयत सरकारी अधिकार्यांचे हाजेरींत मुख्यमंत्र्यांनी रेसिंग गाडयांची आनी ट्रॅकाची पळोवणी केली.
हे सर्तीच्या आयोजनाक लागून गोंयच्या पर्यटनाक नवी दिका मेळटाली, असो विस्वास मुख्यमंत्र्यांनी उक्तायलो. अशे तरेच्या संवसारीक पांवड्यावेल्या सर्तींक लागून राज्यांत फकत खेळां संस्कृती रुजची ना, जाल्यार थळाव्यां खातीर रोजगाराच्यो व्हड संदीय उपलब्ध जातल्यो. एकाच वेळार सांस्कृतीक दायज जपपी कार्निव्हल आनी आधुनीक खेळ F4 रेसिंग हाका लागून गोंयचें नांव परत संवसारार पर्जळटलें.
जाल्यार कार्निव्हलाक लागून शेनवार, १४ फेब्रुवारीक पणजेचे येरादारींत बदल केल्ल्यान पुलिसांनी विशेश ट्रॅफिक ऍडव्हायजरी जारी केल्या.
सहकारी संस्था मार्गदर्शन
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
