भांगरभूंय | प्रतिनिधी
आयआयटीच्या दिक्षांत सुवाळ्यांत मुख्यमंत्र्याचें आस्वासन
पणजी : गोंयांत आयआयटी कॅम्पस खातीर बेगीनूच प्रशस्त अशी कायमस्वरूपी सुवात दितले, अशें आस्वासन मुख्यमंत्री डॉ. प्रमोद सावंत हांणी आयआयटीच्या दिक्षांत सुवाळ्याक दिलें. आयआयटी, गोंयच्यान पदवी घेतिल्ल्या विद्यार्थ्यांनी गोंयच्यो यादी कायम राखून दवरतना विकसीत गोंयां खातीर योगदान दिवचें, असो उलो मुख्यमंत्र्यांनी मारलो.
गोवा आयआयटीचो सवो दिक्षांत सुवाळो आयज आयतारा फोंड्यां जालो. सुवाळ्याक आयआयटीचे संचालक प्रा. धिरेन सिकट्टी, संचालक मंडळाचे अध्यक्ष अदील सिराज झैनुलभाई आनी सिनेटचे वांगडी हजर आशिल्ले. ह्या वेळार १७४ विद्यार्थ्यांक बी. टेक, एम. टेक. आनी डॉक्टरेट पदवीन सन्मानीत केले.
विद्यार्थी दशेंतल्यो यादी आनी अनुभव न विसरपा सारके आसतात. कोल्हापुराक आपूण अध्ययन केल्ल्या महाविद्यालयांत आजूय आमी गेट टुगेदर मनयतात. गोंयांत आयआयटीची पदवी घेतिल्ल्या विद्यार्थ्यांनी गोंयां खातीरूय कांय योगदान दिवप गरजेचें. स. मनोहर पर्रीकार हे आयआयटीचे विद्यार्थी आशिल्ले. अभियांत्रिकी फाट्यांत योगदान दिवपा वांगडा तांणी गोंय आनी देशा खातीर योगदान दिलां, असो उल्लेख मुख्यमंत्र्यांनी भाशणांत केलो.
विकसीत भारत २०४७चें सपन पुराय करपाक सगल्यांची मजत तशेंच योगदान गरजेचें. विकसीत गोंय २०३७चें सपन पुराय करपा खातीर सगल्यांनी आतां सावनूच कामाक लागपाक जाय. इमारती, पूल, रेल्वे मार्ग, उपग्रहांची निर्मिती ही अभियंत्यां वरवींच जायत आसता. डिजीटल इंडिया, आयटी, स्टार्ट अप हांचें गोंय मुखेल केंद्र. सगल्या आडमेळींक फाटीं सांडून अभियंत्यांनी नोकरी मेळोवपा परस नोकर्यो तयार करपाचो हेत दवरचो. शिक्षण आनी पदवी म्हत्वाची. तरी तुमचें ज्ञान आनी कार्यूच श्रेश्ठ आसतलें. सगल्या विद्यार्थ्यांक परबीं!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
