भांगरभूंय | प्रतिनिधी
भांगरभूंय । प्रतिनिधी
म्हापशेंः गोंयांत नाचणे हें दुसऱ्य नंबराचें म्हत्वाचें पीक आसा. राज्यांत नाचण्यांचो पीक घेवपाक उर्बां दिवपा खातीर हाच्या फुडें दर वर्साक नाचण्या फेस्त आयोजीत करपाची घोशणा कृशी संचालक नेव्हील आफोन्सो हांणे केली. धुळेर- म्हापशें हांगच्या कृशी फार्मांत कृशी खात्यान आयोजीत केल्ल्या नाचण्यांच्या फेस्ता वेळार ते उलयताले. साबार लोकांक नाचण्यांचें म्हत्व पटोवन दिवपा खातीर कृशी खातें हो उपक्रम चालीक लायता.
ह्या वेळार विभागीय कृशी अधिकारी संपत्ती धारगळकार, सहाय्यक अधिकारी पल्लवी शेट्ये, राहुल जोंधळे, वेवस्थापक सूरज न्हांजी, मिंगेल ब्रागांझा, गिरीष साळगांवकार आनी हेर अधिकारी हाजीर आशिल्ले. फेस्ता मजगतीं नाचणे आनी हेर कड्डन आशिल्ले स्टॉल आशिल्ले. वेगवेगळीं उत्पादना आनी नाचण्याच्या पिठा पसून तयार केल्ले खावपाचे पदार्थ फेस्तांत मांडल्ले. फेस्तांत दिव्यांगाचे स्टॉल आशिल्ले. फेस्तांत शाळा आनी उच्च माध्यमीक विद्यालयांच्या विद्यार्थ्यांनी मनरिजवणेच्यो कार्यावळी सादर केल्यो.
आशिया खंडांत भारतांत सगळ्यांत चड नाचण्याचें उत्पादन जाता. संवसारीक उत्पादनाचे बाबतींत भारतांत 30 तें 40 टक्के नाचण्यांचें उत्पादन जाता. भारताक नाचण्याचें संवसारीक केंद्र जावपाची बरी संद आसा. देशांतले नाचण्याचें उत्पादन 80 टक्क्यांचेर व्हरपाचे यत्न सुरू आसात. गोंयचे लेगीत तांतूंत योगदान आसतलें.
गोंयच्या गांवगिऱ्या वाठारांत नाचणो लोकप्रिय आसा. आतां शारांतल्या लोकांक लेगीत नाचण्याचे जिनस आवडपाक लागल्यात. गोंयची मात नाचण्याच्या पिका खातीर जाय तशी आसा. ताका चड उदक लागना. गोंयांत सध्या 20 हेक्टर वाठारांत नाचण्याचें पीक घेतात. फुडल्या कांय वर्सांत तांतूंत 2 ते 3 पटीनी वाड करपाचो यत्न आसा अशें कृशी संचालक नेव्हील आफोन्सोन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
