भांगरभूंय | प्रतिनिधी
मुख्यमंत्रीः आदिवासी विद्यार्थी संमेलनाचें उक्तावण
भांगरभूंय । प्रतिनिधी
पणजी: गोंयांत आतां बीए पदवी घेवपा सयत हॉस्पिटेलिटी विशयांत पदविका अभ्यासक्रम पुराय करपाची संद उपलब्ध आसा. ड्युएल पदवी मेळपाच्या सुविधेचो विद्यार्थ्यांनी लाव घेवपाची गरज आसा, अशें मुख्यमंत्री डॉ. प्रमोद सावंत हांणी सांगलें. वेर्णा सोमारा आदिवासी विद्यार्थी संमेलनाचें उक्तावण जालें. उक्तावणा उपरांत उलयतना तांणी ही म्हायती दिली.
गोंयांत आतां शिक्षणाच्यो सगळ्यो सुविधा उपलब्ध आसात. पयशें ना म्हूण गोंयांत तरी कोणाचेंच शिक्षण उरूंक शकना. शिश्यवृत्ती आसाच, ते भायर सवलतीच्या दरांत शिक्षणा खातीर रीण उपलब्ध आसा. वैजकी, अभियांत्रिकी सयत कायदो, फार्मसी, कुशळटाय, पर्यटन, नर्सींग अशे सगळे तरेचे अभ्यासक्रम उपलब्ध आसात. अनुसूचीत जाती, जमाती हांचे खातीर राखीव जागे आसले तरी राखीव कोटामदीं लेगीत सर्त सुरू जाल्या. अनुसूचीत जाती, जमातींतलीं भुरगी लेगीत आतां बरी शिकपाक लागल्यात, अशें मुख्यमंत्री डॉ. सावंत हांणी सांगलें. नोकरे खातीर फक्त पदवी घेवप पुराय जावचें ना. कुशळटाय प्रशिक्षण वा वेवसायीक शिक्षण घेवपाची गरज आसा. धावी पास जाले उपरांत गोंय लोकसेवा आयोग परिक्षेची तयारी सुरू करपाक जाय. कर्मचारी भरती आयोग, बँकींग, रेल्वे भरती परिक्षेची तयारी पयली सावन सुरू करपाक जाय, असो सल्लो मुख्यमंत्री डॉ. प्रमोद सावंत हांणी दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
