भांगरभूंय | प्रतिनिधी
पणजीः अंदूं गोंयांत 210 जाणांक कोरोनाची लागण जाल्या, पूण एकल्याक लेगीत मरण येवंक ना. पोरूं 4 हजारा वयर कोरोनाच्यो केशीं नोंद जाल्ल्यो आनी एकल्याक मरण आयिल्लें, अशी म्हायती केंद्रीय भलयाकी आनी कुटुंब कल्याण मंत्रालयान दिल्या.
लोकसभेच्या पटलार लेखी जाप दितना केंद्रीय भलायकी आनी कुटुंब कल्याण राज्यमंत्री प्रतापराव जाधव हांणी म्हणलां, 2022 ते 2024 मेरेन गोंयांत फाटल्या 3 वर्सांत 83,046 कोरोनाच्यो केशीं नोंद जाल्यात जाल्यार 493 जाणांक मरण आयलां. 2022 त वट्ट 78,423 कोरोनाच्यो केशीं नोंद जाल्ल्यो आनी 492 जाणांक मरण आयिल्लें. 2023 त वट्ट 4,413 जाणांक कोरोनाची लागण जाल्ली आनी एकल्याक मरण आयिल्लें. जाल्यार 2024 त 210 जाणांक आतां मेरेन कोरोनाची लागण जाल्या, पूण ह्या दुयेसांक लागून मरण आयिल्ल्याची नोंद ना.
मजगतीं, मंत्रालयान जापेंत म्हणलां, संवसारीक भलायकी संघटने (डब्ल्यूएचओ) प्रमाण 2 डिसेंबर 2024 मेरेन हुस्क्याच्या व्हेरियंटांचो सध्या कसलो प्रसार ना. पूण फक्त एकूच दखल घेवपा सारको व्हेरियंट म्हणटा तो ‘जे एन 1’चो सद्या प्रसार चालू आसा आनी तो संवसारांत पयलेच फावट ऑगस्ट 2023 त सांपडिल्लो. 18 डिसेंबर 2023 त डब्ल्यूएचओन ‘जे एन 1’ दखल घेवपा सारके व्हेरियंट श्रेणींत घातिल्लो. संवसारभर जे एन 1 व्हेरियंट सार्स-कोव्ही-2 व्हायरसाचो सगळ्यांत प्रचलीत व्हेरियंट आसा. भारतांत, सार्स-कोव्ही-2 व्हायरसाचो जे एन 1 व्हेरियंट नोव्हेंबर 2023 त सांपडिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
