भांगरभूंय | प्रतिनिधी
पणजी : अंदूं गोंयांत पर्यटनांत विक्रमी वाड जाल्या. 2025 चे निमाणे कडेन गोंयांत 1.08 कोटी पर्यटकांनी भेट दिली. सदां भशेन देशी पर्यटकांचो आंकडो कोटीच्या घरांत आसा आनी विदेशी पर्यटकांचो फक्त चार टक्के आसा. 2023 चे तुळेंत 2025 त 2.17 लाख आनी 2024 चे तुळेंत 2025 त 3.93 लाख पर्यटकांनी वाड नोंद जाल्या, अशी आंकडेवारी पर्यटन खात्यान जारी केल्या.
गोंयाक भारतांतलें एक फामाद पर्यटन स्थळ म्हूण वळखतात. कोवीड-19 म्हामारी उपरांत पर्यटन मळार खुबूच वाड जाल्ल्याचें दिसून येता. 2024 आनी 2025 ह्या काळांत गोंय पर्यटनान नवो विक्रम केला.
खात्यान दिल्ले आंकडेवारी प्रमाण, 2017 त गोंयांत 68,95,234 देशी आनी 8,90,459 विदेशी पर्यटक आयिल्लें. त्या वेळार वट्ट पर्यटकांचो आंकडो 77,85,693 इतलो आशिल्लो. 2018 आनी 2019 ह्या वर्सांनी पर्यटनांत मध्यम स्वरूपाची वाड जाली आनी वट्ट पर्यटकांचो आंकडो वळींत 80,15,400 आनी 80,64,400 नोंद जालो.
म्हामारी उपरांतच्या काळांत पर्यटन मळार परतून एकदां नेट आयलो. 2023 त गोंयांत वट्ट 86,28,162 पर्यटक आयिल्ले, जाल्यार 2024 त हो आंकडो दोळ्यांत भरपा सारको वाडून 1,04,09,196 जालो. 2025 चे ताजे आंकडेवारी प्रमाण, गोंयांत 1,02,84,608 देशी आनी 5,17,802 विदेशी पर्यटक आयले आनी वट्ट पर्यटकांचो आंकडो 1,08,02,410 जालो.
मजगतीं, चार्टर विमानांतल्यान येवपी विदेशी पर्यटकांची गोंयच्या इनबावंड पर्यटनांत म्हत्वाची भुमिका आसा. 2017 त 1,024 चार्टर उड्डाणां वरवीं 2,49,374 विदेशी पर्यटक गोंयांत दाखल जाले, मात 2019 मेरेन हो आंकडो देंवून 799 उड्डाणां आनी 2,16,738 पर्यटक इतलो जालो.
मोपाचें मनोहर आंतरराष्ट्रीय विमानतळ सुरू जाले उपरांत गोंयच्या हवाई संपर्कांत व्हड सुदारणा जाली. 2023 त दाबोळी आनी मोपा ह्या दोनूय विमानतळां वयल्यान चार्टर सेवा चालू आशिल्ली, आनी वट्ट 356 उड्डाणां वरवीं 72,795 विदेशी पर्यटक आयिल्ले. 2024 त हो आंकडो 266 उड्डाणां आनी 58,680 पर्यटक इतलो जालो. 2025 मेरेन 189 चार्टर उड्डाणां वरवीं 40,336 विदेशी पर्यटक गोंयांत आयले. चार्टर सेवा दाबोळी आनी मोपा ह्या दोनूय विमानतळांचेर चालू आसा.
आंतरराष्ट्रीय नियोजीत विमान सेवा वरवीं येवपी विदेशी पर्यटकांचो गोंयांत म्हत्वाचो वांटो आसा. 2017 त दाबोळी विमानतळा वयल्यान 2,460 आंतरराष्ट्रीय उड्डाणां जालीं आनी 3,35,573 विदेशी पर्यटक गोंयांत पावले. उपरांत 2021 मेरेन प्रवासाचेर घातिल्ल्या निर्बंधांक लागून हो आंकडो ल्हवू ल्हवू उणो जावन फक्त 265 उड्डाणां जालीं आनी 11,971 विदेशी पर्यटकांची नोंद जाली.
2022 पासून पर्यटन क्षेत्रांत ल्हवू ल्हवू पुनरुज्जीवन सुरू जालें. त्या वर्सा 1,135 आंतरराष्ट्रीय उड्डाणां वरवीं 1,34,922 विदेशी पर्यटक गोंयांत पावले. 2023 त मोपा विमानतळ सुरू जाल्याचो परिणाम स्पश्ट दिसपाक लागलो आनी दाबोळी तशेंच मोपा या दोनूय विमानतळां वरवीं वट्ट 1,416 आंतरराष्ट्रीय उड्डाणां जालीं आनी 1,95,067 विदेशी पर्यटक गोंयांत दाखल जाले.
2024 त हो आंकडो वाडून वट्ट 1,546 आंतरराष्ट्रीय उड्डाणां वरवीं 1,95,990 विदेशी पर्यटकांची नोंद जाली. 2025 चे आंकडेवारी प्रमाण, दाबोळी (643 उड्डाणां) आनी मोपा (1,141 उड्डाणां) या दोनूय विमानतळां वरवीं वट्ट 1,784 आंतरराष्ट्रीय उड्डाणां जावन 2,35,798 विदेशी पर्यटक गोंयांत पावले.
‘पर्यटकांचे संख्येंत जाल्ली सेगीत वाड, चार्टर आनी नियोजीत आंतरराष्ट्रीय विमानसेवा तशेंच क्रूझ पर्यटन क्षेत्रांत विदेशी पर्यटनाचें ल्हवू ल्हवू जाल्लें पुनरुज्जीवन ह्यो गजाली राज्याची सुदारिल्ली संपर्क वेवस्था आनी नियोजीत थळ म्हणूनची तयारी अधोरेखीत करता. दर्जेदार पर्यटनाक उर्बा दिवप, बाजारपेठांचें विविधीकरण करप आनी गोंयच्या ‘पुनरुत्पादक पर्यटन’ हे संकल्पनेक फुडें व्हरपा विशीं आमचो भर कायम आसा आनी पर्यटन वाडीचे लाव थळावो समाज, पर्यावरण आनी अर्थव्यवस्थेक दीर्घकालीन रुपान मिळटले, हाची आमी खात्री करता.’
– रोहन खंवटे, पर्यटन मंत्री
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
