गोंयांतल्यो सरकारी इमारती बाबत, तरीय सरकार सुस्तः काँग्रेस

भांगरभूंय | प्रतिनिधी

पणजीः पणजेची समाज कल्याण खात्याची इमारत धोकादायक म्हण घोशीत जाल्या. ते भायर गोंयभरांतल्या सरकारी इमारतींची परिस्थिती सामकीच बाबत जाल्या. तरी लेगीत सरकार त्यो दुरुस्त करपाक कसलींच पावलां उखलिना, असो आरोप काँग्रेसीन केला.

समाज कल्याण खात्याचे इमारतीचे बिरेस्तारा पाखें कोसळ्ळें. पूण सुदैवान कोणाक कसलीच दुखापत जावंक ना. ह्या विशया वयल्यान गोंय काँग्रेस प्रदेशाध्यक्ष अमीत पाटकार आनी काँग्रेसीच्या शिश्टमंडळान आल्तिना वयल्या भौशीक बांदकाम खात्याचे कचेरेंत वचून मुखेल अभियंतो उत्तम पार्सेकार हांकां घेराव घातलो. दायज आनी हेर सरकारी खात्यांचे इमारतीं कडेन भौशीक बांदकाम खात्यान आडनदर केल्या असो आरोप करून सगळ्या सरकारी इमारतींचे सुरक्षे कडेन लक्ष दिवन दुरूस्तीकाम हातांत घेवपाची मागणी केली.

विधानसभेंत दिल्ले जापेंत भौशीक बांदकाम खातें आनी सामान्य प्रशासन खात्यान स्पश्ट सांगलां, 2019 त पणजेची समाज कल्याण इमारत ही धोकादयक म्हूण जाहीर केल्या. हे इमारतींत सुमार 250 अधिकारी कामाक आसतात. ते भायर येवजेणेचे पयशे मेळूंक नाशिल्ल्यान कितलेशेच दिव्यांग, जाण्टे, विधवा बायलो हे कचेरेक भेट दितात. भौशीक बांदकाम खात्यान ल्हानसान दुरुस्तीचें काम सोडून कसलींच पावलां उखलूंक नात, असो आरोप पाटकार हांणी केलो.

माथानी साल्ढाणा प्रशासकीय इमारत, रवीन्द्र भवन मडगांव, पोरणी जीएमसी इमारत आनी मॅकनीझ पॅलेस कांपाल, बाल भवन कांपाल, जुन्ता हावस पणजी, विंगड विंगड सरकारी शाळेच्यो इमारती, हॉस्पिसियो हॉस्पिटल, पोरणी जीएमसी बिल्डींग रायबंदर ह्या इमारतींची स्थिती बाबत जाल्या अशी जाप भौशीक बांदकाम मंत्र्यान 2023 त विधानसभेंतल्या प्रस्नाक दिल्ली. पूण सरकारान ह्यो इमारती दुरूस्त करपाचे नदरेन कसलेच उपाय करूंक नात, असो आरोप पाटकांर हांणी केला. सरकारान बेगिनूच ह्या इमारतींचें बांदकाम तशेंच सुरक्षा ओडीट करचें आनी तांचें दुरूस्तीकाम हातांत घेवचें. ना जाल्यार व्हड आंदोलन काँग्रेस करतलो. काँग्रेसीचे आमदार विधानसभेंत ह्या विशयाचेर आवाज काडून हो विषय लावन धरतले, अशें पाटकर हांणी भौशीक बांदकाम खात्याच्या अधिकाऱ्यांक सांगलें.