गोंयांतल्यो बायलो एक नंबर

भांगरभूंय | प्रतिनिधी

मोबायल फोन वापरतांत आमी गोंयकार पयल्या क्रमांकाचेर आसात. ताचो बऱ्या कामां खातीरुच वापर करपाचो सोपूत घेवया.

भाकरी परतूंक ना जाल्यार ती करपता. तसोच जो काळा वांगडा रावंक ना, तो फाटीं पडटा. विज्ञान, तंत्रज्ञानाचे बाबतींत तर सगल्यांनी 24 वरां जागृत रावंक जाय. तें शिकूंक जाय, वापरूंक जाय. अर्थांत जापसालदारकेन! वापरचो ना, तो शेणटलो. हाचें बरें उदाहरण म्हणल्यार मोबायल फोन (ताचे वयल्या अॅपां सयत). हाचे मुखार सगलींच कामां मोबायल फोनांत विलीन जातलीं आनी मनांत नासलें तरी हाताच्या तळटार रावपी ह्या उपकरणाक आमकां शरण वच्चेंच पडटलें. झक मारीत म्हणटात तशें!! भलायकी मंत्रालयाचो राष्ट्रीय कुटुंब भलायकी सर्वेक्षणाचो अहवाल जाहीर जाला. तातूंत मोबायल फोन वापरांत कोण मुखार आसात, ताची म्हायती दिल्या. गोंयांतल्या बायलांनी पयलो क्रमांक मेळयला. 91.2 टक्के बायलो मोबायल वापरतात. आमचे फाटोफाट सिक्कीम (88.6) आनी केरळ (86.6) हांचो क्रमांक लागता. तर सगल्यांक कमी मध्यप्रदेश (38.5), छत्तीसगढ (40.7), उत्तरप्रदेश (46.5) आसात. लोकांक डिजीटल माध्यमां कडेन हाडपाक केंद्र सरकारान खास येवजण आंखल्या. ती येशस्वी जावपाक लागल्या.
संवसारांत सगल्यांत चड मोबायल फोन नंबर आसात चीनांत. सादारण 1 अब्ज 60 कोटी. तर भारतांत 1 अब्ज 50 कोटी. हाचो अर्थ लोकसंख्ये परस चड फोन नंबर. सगल्यांच कडेन स्मार्ट फोन नात. तर थोड्यां कडेन 2- 3 फोन आसात. गोंयांत वा हेर कडेन बायलो (आनी दादलेय) मोबायल फोन वापरतात, तो सोशल मिडिया पळोवपाक. डिजीटल साक्षरताय अभियानांतूय दादल्यां परस बायलो मुखार आसात. गोंयांत मोबायल फोन वापरपी 15 ते 29 पिराय गटांतल्यो बायलो चड आसात. सोशल मिडियाचें व्यसन लागिल्ल्यां मदीं बायलोय आसात, तशे दादलेय. सोशल मिडिया वापराची आंकडेवारी पळोवया- फेसबूक वापरपी भारतांत 49 कोटी लोक आसात. तातूंत 72 टक्के दादले. संवसारांत 2 अब्ज 85 कोटी लोक फेसबूक वापरतात. भारतांत व्हाॅट्सअॅप वापरपी 48 कोटी आसात. वर्साक 17 टक्के वाडटात. तर संवसारांत 200 कोटी लोक व्हाॅटसअॅपाचो वापर करतात. इन्स्टाग्राम वापरपी 23 कोटी भारतीय आसात. जगभरांत 1 अब्ज नागरीक तो वापरतात. ट्विटराचे भारतांत अडेज कोटी खातेदार आसात. तर संवसारांत 37 कोटी. फुडल्या वर्साच्या सुरवेक मेरेन हो आंकडो देवन 33 कोटी जावपाचो आसा, असो जाणकारांचो अदमास. युट्यूब वापरपी 47 कोटी भारतीय आसात. तर जगभरांत 2 अब्ज 30 कोटी. हे सगले आंकडे हाचे परस थोडे चड आसुंये, पूण कमी आसचे नात, इतले आमकां सोशल मिडियाचें पिशें लागलां….. आनी हें पिशें फुडल्या 7-8 वर्सांनी आनीक वाडटलें. दुबावूच ना!!
मोबायल फोनाच्या व्यसनाच्या खूब टिका जाता. कारण आमची जिणेशैलीच ताका लागून बदल्ल्या. एकमेकांगेर वचपाचें, उलोवपाचें प्रमाण देंवलां. फिरप कमी जालां. दोळ्याचीं दुयेंसां वाडल्यांत. एकमुळ्या लोकांचें प्रमाण वाडलां. जेवण- खाण घरांत मागोवप्यांचो आंकडो वाडला म्हणजे रांदपी देंवल्यात. आनीक पंचवीस वर्सांनी गोंयकार रांदपूच सोडपाक शकतात वा दुयेंसां, भलायकी इबाडपाचें प्रमाण वाडिल्ल्यान घरांतलेंच जेवपाक शकतात. मोबायल फोन (प्रत्यक्षांत सोशल मिडिया) तसो फायद्याचो आनी लुकसाणूय करपी. सोशल मिडियाचो, झूम सारक्या अॅपांचो वापर करून कोरोना काळांत भुरग्यांक शिक्षण घेवपाक मेळ्ळें, नोकरदारांनी घरांत बसून काम केलें. ही अमूल्य अशी गजाल. साबार लोकांनी त्या काळांत वा उपरांत घरगुती उद्देग सुरू केले. बाजारपेठ मेळोवपाक सोशल मिडियाचो वापर केलो. तांकां योग्य असो प्रतिसादूय मेळटा. कांय गटांचे तर लाखा वयर फाॅलोव्हर आसात. व्हाॅट्सअॅप तर आतां पोस्टाचें काम करता. समाजाचें सामान्य ज्ञान वाडोवपाचें काम सोशल मिडियान केलां. मनोरंजन तर जाताच, पूण कला, संस्कृती, दायज, भाशा नवे पिळगे मेरेन पावोवपाचें, व्हिडियो वरवीं राखून दवरपाचें काम जालां.
सोशल मिडियाक लागून लोकांची दिशाभूल करप, दुस्वास पातळावप, समाज- धर्मां मदीं फूट घालपाचें कामूय जाता. विरोधी प्रचार जाता. दर खेपे येश मेळटाच अशें ना. पूण लोकांच्या काळजांतली कोडसाण वाडोवपाचें काम जालां. सोशल मिडियान भायल्यो भानगडी वाडयल्यात. कबूतर जा जा, म्हणपाची आतां गरज ना. आतंकवादी कारवायो, गुन्यांवांचे गुप्त संदेश…. हेंय मोबायल फोनाक लागून जालां. आॅनलायन विक्री वाडिल्ल्यान माणकारांचेर हावळ आयल्या. मोबायल फोन वापरपांत आमी गोंयकार पयल्या क्रमांकाचेर आसात. ताचो बऱ्या कामां खातीरुच वापर करपाचो
सोपूत घेवया.