भांगरभूंय | प्रतिनिधी
भांगरभूंय । प्रतिनिधी
पणजीः भौशीक बांदकाम खात्यान विवीध वाठारांनी आशिल्ल्या 27 सरकारी इमारती आनी हेर बांदकामां मदल्या 26 बांदकामांचें स्ट्रक्चरल ऑडीट पुराय केलां. तातूंतलीं 9 बांदकामां मातये भरवण करपाचो निर्णय भौशीक बांदकाम खात्यान घेतला, अशी म्हायती खात्यांतल्या सुत्रांनी शेनवारा ‘भांगरभूंय’ कडेन उलयतना दिली.
राजधानी पणजी सयत हेर वाठारांनी खूब वर्सां सावन उब्यो आशिल्ल्यो इमारती तशेंच हेर बांदकामां फाटल्या कितल्याश्याच वर्सां सावन धोकादायक स्थितींत आसात. 2023 त विधानसभा अधिवेशनांत विरोधी पक्ष फुडारी युरी आलेमांव हांणी विचारिल्ल्या लेखी प्रस्नाचे जापेंत तेन्नाचे भौशीक बांदकाम मंत्री निलेश काब्राल हांणी गोंयांतल्यो 168 सरकारी इमारती धोकादायक स्थितींत आशिल्ल्याचें स्पश्ट केल्लें. मॉन्सून काळांत पावसाचो नेट वाडले उपरांत ह्यो इमारती कोसळून व्हड प्रमाणांत जिवीत आनी वित्त हानी जावपाचो धोको आसा. ताका लागून ह्या इमारतींचें ऑडीट करून सामक्योच धोकादायक आशिल्ल्यो इमारती मातये भरवण करपाचो सल्लो विरोधी आमदारांनी सरकाराक दिल्लो. ते प्रमाण सरकारान धोकादायक स्थितींत आशिल्ल्या इमारतींचें स्ट्रक्चरल ऑडीट करपाक सुरवात केली. पयल्या पांवड्यार सरकारी इमारती आनी हेर मेळून 27 बांदकामां धोकादायक स्थितींत आशिल्ल्याचें दिसलें. तातूंतल्या 26 बांदकामांचें भौशीक बांदकाम खात्यान फाटल्या कांय म्हयन्यांत स्ट्रक्चरल ऑडीट पुराय केलां. तातूंतलीं 9 बांदकामां मातये भरवण करपाचो निर्णय घेतला. फुडल्या कांय दिसां भितर हे विशींची प्रक्रिया सुरू करतले, अशी म्हायती सुत्रांनी दिली.
काँग्रेसीन प्रधान मुख्य अभियंत्याक घातिल्लो घेराव
धोकादायक स्थितींत आशिल्ल्या खूबश्या इमारतींनी सरकारी कार्यालयां आसात. विवीध कामा निमतान गोंयभरांतले लोक ह्या कार्यालयांनी येतात- वतात. सध्या पावसाचें प्रमाणूय वाडलां. अशे स्थितींत धोकादायक इमारती कोसळून खूब जाणांचे जीव वचूं येतात. ते खातीर हे इमारतींची तत्काळ दुरुस्ती करची वा त्यो मोडच्यो, अशी मागणी करून काँग्रेस प्रदेशाध्यक्ष अमीत पाटकार हांचे सयत हेर फुडाऱ्यांनी दोन दिसां आदीं भौशीक बांदकाम खात्याचे प्रधान मुख्य अभियंते उत्तम पार्सेकार हांकां घेराव घातिल्लो.
धोकादायक इमारती मोडपाची प्रक्रिया सुरू
धोकादायक स्थितींत आशिल्ल्ल्या सगळ्याच सरकारी इमारतीं आनी बांदकामांचें भौशीक बांदकाम खात्या वतीन ऑडीट करतात. ज्या इमारतींचो थळाव्या लोकांक धोको आसा, अश्यो इमारती मोडपाची प्रक्रिया खात्यान सुरू केल्या. दुरुस्तीची गरज आशिल्ल्या इमारतींची ताकतिकेन दुरुस्ती करतले, अशी म्हायती भौशीक बांदकाम खात्याच्या इमारत विभागाचे मुख्य अभियंते संतोष म्हापणे हांणी ‘भांगरभूंय’ कडेन उलयतना दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
