भांगरभूंय | प्रतिनिधी
पोरण्यां बांदकामांची जातली तपासणी
प्रशासनाक खर पावलां उखलपाचे आदेश
जिल्होधिकारी आनी ‘डीडीएमए’क जापसालदारकी
भांगरभूंय । प्रतिनिधी
पणजी : गोंयांत विवीध वाठारांनी जीर्ण जाल्ल्यो इमारती कोसळपाच्या घडणुकांची सरकारान गंभीर दखल घेतल्या. चड करून दाट लोकवस्ती आशिल्ल्या वाठारांनी अश्या इमारतींक लागून निर्माण जावपी धोको आनी पावसाळ्यांतलें संकश्ट लक्षांत घेवन प्रशासनाक खर पावलां उखलपाचे आदेश दिल्यात.
आपत्ती वेवस्थापन कायदो, 2005 च्या कलम 33 आनी 34 खाला जिल्होधिकारी आनी जिल्हो आपत्ती वेवस्थापन प्राधिकरणांक (डीडीएमए) जीर्ण इमारतीं सोदून गरजेची उपाय येवजण करपाचे अधिकार आनी जापसालदारकी दिल्या. हे नदरेन जिल्होधिकाऱ्यांक फुडल्या सुचोवण्यांची अमलबजावणी करपाचे निर्देश आपल्या कार्यक्षेत्रांतल्यो अश्यो इमारती सोदच्यो ज्यो रचनात्मक नदरेन दुबळ्यो आसात, सोडून दिल्यात वा भौशीक तशेंच लोकांक रावपा खातीर असुरक्षीत आसात. थळाव्या स्वराज्य संस्थां कडेन समन्वय सादून पालिका, पंचायत ह्या संस्थां कडल्यान अश्या इमारतींची वळेरी घेवची. थळाव्या प्राधिकरणांक निर्देश दिवप, तंत्रीक तज्ञां वरवीं रचनात्मक सुरक्षेची तपासणी करप, धनी/ बिराडकारांक नोटीस जारी करप, गरज आसल्यार बॅरिकेडींग, स्थलांतरण वा जिल्होधिकाऱ्यांनी आपले अधिकार वापरून इमारत मोडपाची कार्यवाही करची. हे प्रक्रियेक कळाव जाल्यार खर कारवाय करतले, अशें महसूल खात्यान आपल्या आदेशांत म्हणलां. थळाव्या संस्थांनी वेळार कृती केली ना जाल्यार जिल्होधिकाऱ्यानी आपत्ती वेवस्थापन कायद्या प्रमाण स्वता हस्तक्षेप करून प्रतिबंधक वा दंडात्मक उपाय येवजण करची. ही कार्यवाही तत्काळ करून अहवाल सादर करपाचे आदेश संबंदीत अधिकाऱ्यांक दिल्यात. पावसाळ्याचे फाटभुंयेर ही कारवाय खूब म्हत्वाची आसा, कसलीय दुर्घटणा घडचे आदीं प्रशासनान खबरदारी घेवचे खातीर ह्यो उपाय येवजण्यो केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
