भांगरभूंय | प्रतिनिधी
केंद्रीय अर्थ राज्यमंत्री पंकज चौधरी हांची लोकसभेंत लेखी म्हायतीपणजीः 30 जून 2025 मेरेन गोंयच्या 1 लाख 11 हजार 502 जाणांनी 2024-25 वित्तीय वर्सा खातीर येणावळ कर रिटर्न (आयटीआर-1) दाखल केला. हातूंतल्यान 19.60 टक्के म्हळ्यार 21 हजार 856 लोकांचें वर्सुकी उत्पन्न 10 ते 50 लाख रुपया मदीं आसा. जाल्यार 89 हजार 646 लोकांचें (80.40 टक्के) वर्सुकी उत्पन्न 2.5 ते 10 लाख रुपया मदीं आसा. केंद्रीय अर्थ राज्यमंत्री पंकज चौधरी हांणी लोकसभेंत दिल्ल्या लेखी जापेंतल्यान ही म्हायती मेळ्ळ्या. हे संबंदी खासदार डॉ. पी. पूर्णादेस्वरी हांणी अतारांकीत प्रस्न उपस्थित केल्लो.
जापेंत दिल्ले म्हायती प्रमाण, 2024-25 वित्तीय वर्सा गोंयांतल्यान येणावळ कर भरपी वट्ट करदात्यांतल्यान 6,667 जाणांक (5.97 टक्के) वर्सुकी येणावळ 10 ते 12 लाख रुपया आसा. 6,307 लोकांचें (5.65 टक्के) वर्सुकी उत्पन्न 12 ते 15 लाख रुपया आसा. 6,591 लोकांचें (5.91 टक्के) वर्सुकी उत्पन्न 15 ते 25 लाख रुपया मदीं आसा. जाल्यार 2,291 लोकांचें (2.05 टक्के) वर्सुकी उत्पन्न 25 ते 50 लाख रुपया मदीं आसा. जाल्यार 11 हजार 760 (10.54 टक्के) लोकांचें वर्सुकी उत्पन्न 7.5 ते 10 लाख रुपया मदीं आसा.
वयल्या काळांत चडांत चड आयटीआर दाखल केल्ल्या 46 लाख 13 हजार 862 लोकांनी महाराष्ट्रांतल्यान आयटीआर दाखल केल्यात. तातूंतल्या 1 लाख 37 हजार 141 जाणांनी वर्सुकी येणावळ 25 ते 50 लाख रुपया मदीं जाहीर केल्या. हाचे उपरांत उत्तर प्रदेशांतल्यान 34.60 लाख, तमिळनाडूंतल्यान 25.70 लाख, कर्नाटकांतल्यान 22.70 लाख, राजस्थानांतल्यान 22.03 लाख लोकांनी आयटीआर दाखल केल्यात. देशांतले सगळ्यांत उणे आयटीआर मिझोरामांतल्यान दाखल केल्ले 7,595 आयटीआर आसात.
चडशे आयटीआर 2.5 ते 5 लाखांच्या उत्पन्न गटांतले आसात
जापेंत दिल्ले म्हायती प्रमाण 2024-25 वर्सा राज्यांतले सगळ्यांत चड 34 हजार 626 (31.04 टक्के) आयटीआर-1 वर्सुकी येणावळ 2.5 ते 5 लाख आशिल्ल्या गटाचे आसात. 31 हजार 631 लोकांचें वर्सुकी उत्पन्न 5 ते 7.5 लाखां मदीं आसा.
जाल्यार 11 हजार 629 जाणांनी आपलें वर्सुकी उत्पन्न 2.5 लाख वा ताचे परस उणें अशें सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
