भांगरभूंय | प्रतिनिधी
पणजीः गोंयांतल्या मतदारांची खाशेली फेरतपासणी (एसआयआर) पुराय जाले उपरांत वट्ट 1 लाख 78 मतदारांचीं नांवां मसुदो वळेरेंतल्यान वगळ्ळ्यांत. 11 डिसेंबराच्या निमाणे मेरेन 10 लाख 84 हजार 956 (91.55%) मतदारांचे एन्युमरेशन फॉर्म एकठांय करून डिजिटायझेशन जालां. सुमार 1 लाख 82 हजार 855 मतदारांचीं नांवां (8.45 टक्के) वा तांच्या पालकांचीं नांवां 2002 वर्साच्या मतदार वळेरेंत नात. अशा मॅपिंग नाशिल्ल्या मतदारां संबंदी सुनावणी घेतले उपरांत निमाणो निर्णय घेतले अशी म्हायती मुखेल वेंचणूक अधिकारी संजय गोयल हांणी दिली.
शेनवारा पणजेंत जाल्ल्या पत्रकार परिशदेंत गोयल हांणी सांगलें, फॉर्म परतून येवंक नाशिल्ल्यान 1 लाख 78 मतदारांचो एएसडीडी श्रेणींत आस्पाव केला. हातूंत मेल्लें, गैरहाजीर, दुप्पट नांव आशिल्ले वा कायमचे पत्तो बदलिल्ल्यांचो आस्पाव आसा. 16 डिसेंबराक उजवाडाक येवपी मसुदो वळेरेंत तांचीं नांवां आसचीं नात. अशा मतदारांचीं नांवां ऑनलायन आनी ऑफलायन पद्धतीन जाहीर करतले. तातूंतल्या खंयच्याय मनशाक आपलें नांव चुकीचें पद्धतीन काडलां अशें दिसलें जाल्यार तांणी फॉर्म 6 भरप गरजेचो.
अशा व्यक्तींक घोशणापत्रूय सादर करचें पडटलें. सगळी कागदपत्रां बरोबर आसल्यार त्या व्यक्तींचीं नांवां निमाणे मतदार वळेरेंत आस्पावतले. गोंयांत ह्यान पयलीं 2002 वर्सा एसआयआर केल्लो. 2002 आनी 2025 वर्साच्या मतदारांची वळेरी तपासली तेन्ना सुमार 1 लाख 82 हजार 855 मतदारांचे मॅपिंग जावंक ना. हाचो अर्थ ह्या मतदारांचीं नांवां वा तांच्या पालकांची नांवां 2002 वर्साच्या मतदार वळेरेंत नात. ह्या सगळ्या लोकांचीं नांवां मसुद्याच्या वळेरेंत येतली. 16 ते 20 डिसेंबर ह्या काळांत तांकां नोटीस धाडटले. हाचे खातीर सुनावणी घेवन निमाणो निर्णय घेतले.
आंकडेवारी
वट्ट मतदार – 11 लाख 85 हजार 34
एन्युमरेशन फॉर्म एकठांय – 10 लाख 84 हजार 956
मॅपिंग जावंक नाशिल्ले – 1 लाख 82 हजार 855
मेल्लें मतदार – 25 हजार 574
कायमस्वरुपी पत्तो बदल्लो – 40 हजार 473
गैरहाजीर – 29 हजार 750
दोट्टी मतदान – 2008
फॉर्माचेर सय ना आनी हेर कारणांक लागून – 2273
मतदान केंद्रांत वाड
एसआयआर प्रक्रिये उपरांत उत्तर गोंयांत 1 आनी दक्षीण गोंयांत 7 मतदान केंद्र वाडयलां. जाल्यार दक्षीण गोंयांतलीं 2 मतदान केंद्रां बंद केल्यांत. हाका लागून आतां गोंयांतली वट्ट मतदान केंद्रांची संख्या वाडून 1731 जाल्या. राजकी पक्षांच्या प्रतिनिधींक हे संबंदी कल्पना दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
