गोंयांतल्या सगळ्या भयणींची राखण करपाक सदांच तयार: मुख्यमंत्री
भांगरभूंय | प्रतिनिधी
मुख्यमंत्र्यांक खुबश्या भयणींनी राखी बांदली
दिवचल ः रक्षाबंधन हो भाव- भयणी मदीं आशिल्ले आपुलकायेचो सण. रक्षाबंधन ही परब भयण-भावाचें नातें घट्ट करपी परब. आयज रक्षाबंधनाच्या निमतान मुख्यमंत्र्यांक खुबश्या भयणींनी राखी बांदली आनी परबीं भेटयलीं. ह्या वेळार सुता पुनवेच्या निमतान मुख्यमंत्र्यानी समेस्त गोंयकारांक परबीं भेटयलीं.
मुख्यमंत्री म्हूण हांव गोंयच्या सगळ्या भयणीं-बायलांची राखण करपाक कटिबद्ध आसा आनी बायलां खातीर जायत्या कल्याणकारी येवजण्यां वरवीं बायलांक आदार दिवपा खातीर म्हजें सरकार प्रामाणीकपणान वावुरता अशें मुख्यमंत्री डॉ. प्रमोद सावंत हांणी स्पश्ट केलें.
रक्षाबंधनाच्या निमतान जायत्या बायलांनी मुख्यमंत्र्यांक राखी बांदली. तशेंच मुख्यमंत्र्यांची भयण वीणा देसाय हिणेंय मुख्यमंत्र्याक राखी बांदून तांकां शुभेच्छा दिल्यो. तशेंच मुख्यमंत्री डॉ. प्रमोद सावंत हांकां शिवोलेची आमदार डिलायला लोबो हांणी राखी बांदली.
गोंयच्या सर्वांगीण उदरगती खातीर गोंय सरकार लेगीत वेगवेगळ्यो येवजण्यो आंखता. विधानसभा अधिवेशनांत घरां कायदेशीर करपा सयत जायते महत्वाकांक्षी निर्णय घेतना आमचें सरकार राज्यांतल्या लोकांक जायत्या गजलीं पसून थाकाय दिवपा खातीर वावुरता. रक्षाबंधनाच्या दिसा म्हाका राखी बांदून पवित्र नातें जोडपी राज्यभरांतल्या सगळ्या भयणींक आपूण परबीं दितां अशें मुख्यमंत्र्यान सांगलें.
विकसीत भारत आनी विकसीत गोंयचें सपन साकार करपा खातीर गोंयच्या सगळ्या भाव-भयणींनी सेगीत वावुरचें असो उलो मुख्यमंत्र्यान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
