भांगरभूंय | प्रतिनिधी
भांगरभूंय । खबरां संस्था
पणजीः राज्यांतल्यां सगल्या शिक्षणीक संस्थाची सुलभताय तपासणी (अक्सेस ऑडीट) करपा खातीर राज्य दिव्यांगजन आयुक्त कार्यालयान सगली तयारी पुराय केल्या. राष्ट्रीश शिक्षणीक धोरण तशेंच दिव्यांग व्यकींचे अधिकारी कायदो 1016 हाचे कडेन ह्या शिक्षणीक संस्थांक सुसंगत करपाच्या हेतान हो तपासणी उपक्रम म्हत्वाचो थारतलो.अशें राज्याचे दिव्यांगजन आयुक्त गुरुप्रसाद पावसकारा हाणे सांगलें.
हे तपासणे खातीर राज्य दिव्यांगजन आयुक्त कार्यालयान सुलभताय ऑडिटराची नियुक्ती केल्या. राज्य शिक्षण संचालनालय, उच्च शिक्षण संचालनालय आनी गोंय विद्यापिठा कडेन संलग्न सरकारी अनुदानीत शाळा. म्हाविद्यालयांक भेट दिवंन थंयच्या शिक्षण सुलभताये विशींचो अहवाल फुडले कार्यवाही खातीर शिक्षण खात्याक हें अक्सेस ऑडिटर सादर करतले. सर्वसमावेशक सामाज घडोवपाच्या यत्नांचो एक भाग म्हणून शिक्षणीक संस्थांची तपासणी करपाचें हें काम हातांत घेतले.
राज्य दिव्यांगजन आयुक्त कार्यालयाचे वा कार्यालयान नियुक्त केल्ल्या संस्थांचे प्रतिनिधी शिक्षण अनुदानीत शिक्षणीक संस्थांक भेट दिवंन थंयच्या शिक्षण सुलभतायेच्या दर्जाची पळोवणी करतले. ह्या उपक्रमा खातीर नियुक्त केल्ल्या तपासणी प्रतिनिधींक सहकार्य करपाचें आनी सुलभताय ऑडिट पुराय करपा खातीर मजत करपाची सूचोवणी राज्यांतल्या सगल्या शिक्षणीक संस्थांच्या मुखेलींक दिल्या.
1 जुलय सावन सुरू ही तपासणी सुरू जातली. शिक्षणीक संस्थातल्या मुळाव्या सुविधांची मोलावणी करतले. दरेका संस्थेचो विशीश्ट गरजो आनी आव्हानां हाची म्हायती घेतले. उपलब्द सुवात, शिक्षणीक साधना, सहाय्यक साधना आनी तंत्रगिन्यान हाची तपासणी करपाचें काम जातलें. ऑडिटा उपरांतच्या बदलांत प्रवेश योग्य मार्ग, रॅम्प, रेलिंग, ब्रेल आनी भोवभाशीक स्पर्श चिन्हां आनी टॉयलेट, तळमाळे वयल्या वर्गांच्यो कुडी हे विशीं अहवालांत शिफारशी करतले.
दिव्यांग विद्यार्थ्यांचे नदरेन सर्वसमावेशक शिक्षणाचें वातावरण तयार करपा खातीर मुळाव्या सुविधांत बदल तशेंच शिक्षक आनी सहाय्यक कर्मचाऱ्यांक प्रशिक्षण दिवपाची गरज आशिल्ल्यान शिक्षणीक संस्थांनी कसल्या गजालींचो उणाव आसा हें ह्या ऑडिट अहवालांतल्यान सामकार येतलें. तशेंच व्यापक शिक्षक प्रशिक्षण उपक्रमाच्या माध्यमांतल्यान मुळाव्यो सुविधा, शिकोवपाची पद्दत आनी कर्मचारी तांकीची उदरगत करपा खातीर व्हो सुलभताय तपासणी उपक्रम मार्गदर्शक थारतलो, अशें पावसकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
