भांगरभूंय | प्रतिनिधी
सगळ्यांक पुरायपणान समजुचे पयलींच कृत्रिम बुद्धीचें (एआय) युग सुरू जालां. आयच्या तंत्रगिन्यानान आमच्या संवसारांत बदल घडोवन हाडपाची प्रचंड तांक दाखयल्या. एआय आतां औपचारीक चर्चा आनी शिक्षणीक कार्यावळींचो म्हत्वाचो भाग जाला. गोंयां सयत संवसारभरांतल्यो संस्था विद्यार्थ्यांक सशक्त करपा खातीर एआयचो प्रभावी वापर करपाचे मार्ग सोदून काडटात. तेच बरोबर विद्यार्थ्यांची सृजनशीलताय आनी तार्कीक विचार प्रक्रिया तिगोवन दवरपाचीय खात्री करतात.
अंदूंच्या आंतरराष्ट्रीय शिक्षण दिसाचो विशय ‘कृत्रिम बुद्धिमत्ता आनी शिक्षण: स्वयंचलीत संवसारांत मानवी हक्कांची राखण’ आशिल्लो. मनशाची तांक चड प्रभावी आनी सक्षम करपाक कृत्रिम बुद्धी (एआय) कशी उपेगी थारूंक शकता, तांकां ती कशी उपेगी पडूं येता हें दाखोवप हो ताचो मुखेल हेत. गोंयांतल्यो शाळा आनी शिक्षणीक संस्था हाची एक व्हड देख. कारण शिक्षण चड पारदर्शक, दर्जेदार आनी मनशाचे तांकीचे उदरगती खातीर फायदेशीर करपाक एआयचो वापर कसो करूं येता हाचेर तांचें लक्ष आसा.
सांखळेच्या गोवा इन्स्टिट्यूट ऑफ मॅनेजमेंटांतले (जीआयएम) बिग डेटा एनालिटिक्सचे (बीडीए) मुखेल प्राध्यापक बालसुब्रमण्यम हे संस्थेन शिक्षणांत जिज्ञासा निर्माण करपा खातीर एआयचो वापर कसो केला तें सांगतात. फकत कार्यक्षमतायचेर न्हय, तर एआयच्या आदारान विद्यार्थ्यांक तांची तांक वाडोवपाक आनी वास्तव जगांतले प्रस्न सोडोवपाक मदत जाता. मशीन लर्निंग, डीप लर्निंग, आनी जनरेटिव्ह एआय ह्या अभ्यासक्रमांतल्यान विद्यार्थ्यांक हाताळणी प्रकल्प आनी अनुकरणां वरवीं मार्केटिंग आनी अर्थशास्त्र ह्या सारक्या वाठारांनी वेव्हारीक अणभव मेळटा. उद्देगीक अणभव आशिल्ले प्राध्यापक विद्यार्थ्यांक एआयचो प्रभावी वापर शिकयतात, जें तांकां आव्हानात्मक परिस्थितींत येस मेळोवपाक तयार करतात, अशें तांणी सांगलें.
एआय फकत पारंपरीक शिक्षणीक मळार न्हय, तर सृजनशील मळारय, खास करून रांदपाचे कलेच्या मळार आपली सुवात तयार करपाक लागल्या. वेर्णेंच्या कामाक्षी पाककला संस्थेंत विद्यार्थी पारंपरीक रांदपाचे पद्दती वांगडाच प्रगत एआय साधनांचो वापर शिकतात. रेसिपी तयार करप आनी मेनू नियोजन अशा कामांनी एआय शेफांक मजत करूंक शकता, पूण रांदपाचो जीव मनशाचे सृजनशीलतेंत आसा अशें हे संस्थेचे संस्थापक परिक्षीत पै फोंडेंकार सांगतात. ‘शेफाचो खाशेलो स्पर्श, रुच आनी नदरच त्या पदार्थांक अविस्मरणीय करता.’ कामाक्षींत विद्यार्थी कार्यक्षमताय खातीर एआयचो फायदो घेवन, परंपरा आनी आधुनीक तंत्रगिन्यानाचो मेळ घालून सर्जनशीलता आनी तंत्रीक तज्ञताय एकठांय हाडपी, याद उरपी जेवण तयार करतना आपली स्वताची पाककलेची शैली तयार करतात.
किलोवाॅटचे सहसंस्थापक एरोन फर्नांडीस म्हणटात, विद्यार्थ्यांक फकत एआय वापरपाक न्हय, तर ताचें फुडारपण करपाक सशक्त करप हो ताचो हेत. निर्णय घेवपाक सुदारणा करपाक, नवनिर्माणाक चालना दिवपाक आनी गुंतागुंतीच्या समस्या सोडोवपाक एआय हें एक बळिश्ट साधन. तें मनशाच्या सृजनशीलतेच्या बदलाक न्हय. किलोवॅट विद्यार्थ्यांक कार्यशाळा, इंटर्नशिप, हॅकथॉन अशो संदी दिवन उदयाक येवपी तंत्रगिन्यानाचो हाताळणी अणभव दिता. ह्या कार्यावळींनी तंत्रीक गिन्यान, सृजनशीलताय आनी स्वतंत्रपणान विचार करपाची तांक हांचो मेळ घालतात. उद्देगीक गरजे प्रमाण शिक्षणीक अभ्यासक्रम जुळोवन, केडब्ल्यू विद्यार्थी फुडाराच्या कामाच्या संवसारांत नवें करपाक आनी येसस्वी जावपाक तयार आसात हाची खात्री करता.
एआय उद्देगांत जावपी बदलांचो विचार करून अभियांत्रिकी महाविद्यालयांतल्या म्हायती तंत्रज्ञान विभागाचे प्राध्यापक आनी डीन डॉ. शैलेंद्र अस्वले ह्या परिवर्तनकारी युगा खातीर विद्यार्थ्यांक तयार करपाचें म्हत्व सांगतात. विद्यार्थ्यांक गणिताची, खास करून सांख्यिकी आनी गणिताची बरी समजूत आसपाक जाय. ते भायर मशीन लर्निंग, डेटा हाताळणी साधनां, पायथन सारकिल्या प्रोग्रामिंग भाशांचो आस्पाव करून तंत्रीक कुशळटाय विकसीत करपाची गरज आसा. डॉ. अस्वले हांच्या मतान अणभवात्मक शिकपा वरवीं विद्यार्थ्यां मदीं नवनिर्माणाची प्रेरणा दिवप म्हत्वाचें. हे प्रक्रियेंत विद्यार्थ्यांची समस्या सोडोवपाची तांक हाताळणी प्रकल्प, सर्ती, आनी इंटर्नशिप हांचे वरवीं विकसीत जाता आनी तांकां नैतीक पद्दती आनी समाजा खातीर जापसालदारकेची जाणीव दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
