भांगरभूंय | प्रतिनिधी
‘एससीईआरटी’च्या वरिश्ठ अधिकाऱ्याची म्हायती
दर्ज्या प्रमाण जागृती, प्रगती आनी अभिलाशा
स्कोफ कागदपत्रा वरवीं चार पांवड्याचेर रँकींग प्रक्रिया
भांगरभूंय : समीप नार्वेकार
पणजी : गोंयांत महाविद्यालयां उपरांत आतां शाळांचें लेगीत रँकींग सुरू जातलें. महाविद्यालयाक जशें नॅकाचें रँकींग मेळटा तशेंच शाळांक आतां शाळा दर्जो विश्लेशण आनी आस्वासन आराखडो (स्कोफ) रॅकींग मेळटलें. दर्ज्या प्रमाण शाळांक जागृती, प्रगती आनी अभिलाशा अशें रँकींग दितले, अशी म्हायती राज्य शिक्षण, संशोधन आनी प्रशिक्षण मंडळाच्या (एससीईआरटी) वरिश्ठ अधिकाऱ्यान दिल्या.
गोंयांतल्या शाळांनी शिक्षणीक, साधन सुविधा, प्रशासकीय सेवा आनी हेर मळार सुदारणा करून, सर्तीचें वातावरण तयार करपा खातीर शाळांचें रँकींग प्रक्रिया सुरू करपाचें आमी थारयलां. हें शाळांचें रँकींग थारोवपा खातीर शिक्षण खात्यान गोंय राज्य शाळा दर्जो प्राधिकरणाची (जीएसएसएसए) थापणूक केल्या. जीएसएसएसए हें शिक्षण खात्याचें एक आंग आसा. स्कोफ हें एक कागदपत्र आसा. ताच्या आदाराचेर हें रँकींग थारायतले. स्कोफ हें कागदपत्र राष्ट्रीय शिक्षण, संशोधन आनी प्रशिक्षण मंडळाच्या (एनसीईआरटी) पारेख कागदपत्राच्या मार्गदर्शक तत्वां प्रमाण तयार केलां, अशी म्हायती अधिकाऱ्यान दिली.
स्कोफ कागदपत्रा वरवीं चार पांवड्याचेर ही रँकींग प्रक्रिया जातली. पयल्या पांवड्यार शाळेच्या वेवस्थापनांक प्रशासन, विश्लेशण, अभ्यासक्रम, शिकोवपाची पद्दत, साधन सुविधा आनी समावेशकता क्षेत्रांत प्रस्नपत्रिका दितले आनी तातूंत तीन पर्याय दिवन एक पर्याय तांकां वेंचचो पडटलो. दुसऱ्या पांवड्यार ज्यो प्रस्नांच्यो जापो दिल्यात त्या जापांक वेवस्थापनान कागदपत्री पुरावो लावचो पडटलो.
तिसऱ्या पांवड्यार प्रमाणीकरण प्रकिया सुरू जातली. हातूंत ज्या शाळांनी प्रस्नांच्यो योग्य जापो दिवन 70 टक्के परस चड गूण घेतल्यात त्या शाळांक जीएसएसएसएची बाह्य प्रामाणीकरण पंगड भेट दितले. ज्या शाळांनी 70 टक्के परस उणे गूण घेतल्यात त्या शाळांनी ही भेट जावची ना. चवथ्या पांवड्यार शाळांनी घेतिल्ले गूण आनी जीएसएसएसएच्या प्रामाणीकरण पंगडान केल्ल्या विश्लेशणाची चाचपणी जातली. स्कोफ कागदपत्रां वरवीं शाळेची ग्रेड थारोवन तांकां रँकींग दितले.
ज्या शाळांक ए पल्स आनी ए ग्रेड मेळटा तांकां जागृती दर्जो, ज्या शाळांक बी प्लस आनी ही बी ग्रेड मेळटा तांकां प्रगती दर्जो आनी ज्या शाळांक सी आनी डी ग्रेड मेळटा त्या शाळांक अभिलाशा दर्जो दितले, अशी म्हायती अधिकाऱ्यान दिल्या.
रँकींग एनईपी खाला सक्तीचें
हें रँकींग राष्ट्रीय शिक्षण धोरण (एनईपी) खाला सक्तीचें केलां. ही रँकींग प्रक्रिया कशी चलता ही पळोवपा खातीर आमी सुरवातीच्या काळांत उच्च माध्यमीक विद्यालया सावन सुरू करतले. जर ही प्रक्रिया बरे भशेन फुडे गेली जाल्यार आमी माध्यमीक आनी उपरांत मुळावे शाळांक लेगीत हें रँकींग लागू करतले. हें रँकींग दिवपाची प्रक्रिया जीएसएसएसए पंगड करतलो आनी ह्या पंगडाची अधिसुचोवणी वरवीं निवड लेगीत जाल्या, अशें अधिकाऱ्यांन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
