भांगरभूंय | प्रतिनिधी
गराळ्यो रेंवाळ दर्यादेगो, माडाच्या चुट्टांतल्यांत वाट काडीत जमनीर देंवपी सुर्याचीं किरणां, सगळ्या जगभार फामाद आसललो म्हापशेंचो बाजार, गोंयच्यो जात्रा, जात्रांनी मेळपी खाजें रेवड्यो, गोंयची दिवजां, गोंयची होमखणां, गोंयचीं फेस्तां गोंयचो सायब आनी एक गोंयची खास गजाल म्हळ्यार गोंयांतल्या रस्त्यांचेर मोटारसायकली धांवडावपी गोंयांतले मोटारसायकल पायलट.
पायलट फक्त मळबांत विमानां चलोवपीच न्हय तर रस्त्यांचेर मोटार सायकली चलोवपीय पायलट आसता हाची गवाय गोंय दिता, म्हणच्या परस गोंयांत मेळटा म्हणप सारकें जातलें. गोंयांतच गांवच्या तिंट्यार आपली काळी हळदुवी मोटार सायकल लावन प्रवाशांची वाट पळेयत उबे आसपी गोंयचे पायलट.
ही मोटारसायकलीन प्रवाशांक हाड व्हर करपाची चाल केन्ना सुरू जाली हाचो संदर्भ पुरायपणान मेळना. पूण पुर्तुगेज राजवटी वेळार जेन्ना मोटारसयकलिचीं उत्पादनां जावपाक लागलीं आनी गोंयांतूय त्यो मेळपाक लागल्यो तेन्नाच्यान कांय गोंयकारा कडेन बीएसए आनी बीएमडबल्यू सारकिल्या कारखान्यांचो मोटारसायकली आसल्यो. हे गोंयकारूच वा गोंयांत शेंकड्यांनी स्थायीक जाल्ले पुर्तुगेज म्हण दुबाव आसा. हे मोटारसायकलकार पुर्तुगेज सोल्देरांक हाड व्हर करपाचें भाडीं मारताले. व्हड रुबाबान गोंयच्या रस्त्यांचेर राज करपी गोंयचे रस्त्यार मोटार सायकली धांवडावपी गोंयचे रस्त्यावेले पायलट. 1970 ते 1980 च्या दशकांनी घरां घरांनी अश्यो चार चाकी गाडयो वा मोटारसायकलीय नासल्यो. आपलें पोट भरपाक कांय लोक असल्यो मोटारसायकली आशिल्ल्यांच्यो मोटारसायकली चलोवन आपलें पोट भरताले. रस्त्यांचेर तितल्यो बशीय नासल्यो. गरजेच्या आकांताच्या वेळार आदाराक येताले ते पायलट. कोणाकूय बस चुकली जाल्यार ओफिसाक व्हरून सोडपाचें काम हें पायलट करताले. गांवांतलेच आशिल्ल्यान गांवची बायल जांव दादल्याक पायलटा वांगडा वचपाक कसलीच अडचण दिसनासली. ह्या पायलटांचो चड आदार जातालो दोतोराक हाड व्हर करपाक. कोणूय गांवांत चड बरो ना जाल्यार कोणाय कडेन दोतोराक रकाद धाडल्यार पुरो आसतालो दोतोरांची कुसुरतोर तिंठ्यार आसल्ल्यान दोतोर रोकडोच पायलाटाक घेवन दुयॆंतीगेर पावतालो. दुयेंतीक तपाशिसर पायलट रावतालो आनी परत दोतोराक व्हरून कुसुरतोरीन सोडटालो. दुयेंतीक दिल्ली वख्दां जाय जाल्यार हाडून दितालो वा वख्दां दोतोरा कडेन आसा जर जाल्यार दोतोरागेर थावन दुयेंतीक वखदां दिवन येतालो. मागीर कितें तरी ताचें भाडें पायलट घेतालो. असो तिंठ्यावेलो पायलट सगळ्यांच्या घरचोच आसतालो. फोन, जांव येरादारीचीं साधनां आयचे भशेन नासलीं तेन्ना कोणागेर कोणाक मरण येत जाल्यार पयस रावतल्यां सोयऱ्यांक मरणाचो रकाद पावोवपाचें काम पायलट भेस बरें करतालो. गांवचो जाल्ल्यान कोणागेरूय गेल्या उपरांत ताका तितकोच मान आनी परामसूय जातालो. कोणाल्या घरांत लग्न कार्य आसल्यार पायलटाक घेवन चडशा जाणांगेर वचून पत्रिका दिवपाचें कामूय पायलटाक लागून खूब बरें जातालें. एका दिसाभितर खुबशो पत्रिका दिवन जाताल्यो. आयच्या दिसा सुध्दां कांय गांवांनी अशे विश्वासू पायलट आसात जे लोकांची बारीक बारीक सामान हाडपाचें, भुरगीं भायल्या देशांत आनी हांगां जाण्टी आवय बापूय एकटीं आशिल्ल्यांक वखदां जावं हेर गरजेच्यो वस्तू हाडून दिवपाक लोकांक पावतात.
गांवांतल्यो बायलो आठवड्याच्या बाजाराक येत जाल्यार, बाजारासयत घरा व्हरून पावपाक बायलांचो तिंठ्यार ठरिल्लो पायलट आसतालो. गांवच्या गांवांत येरादारी करपाक कसलेंच साधन आसनासलें. हो जालो गांवांतलो बाजार. हणजुणें, शिवोले हळदोणें गांवांतलीं बायलां म्हापशां शुक्रारा बाजाराक येतालीं, सगळो बाजार घेवन जालो म्हणतच सामानाच्यो चार पांच पोटल्यो फाटल्या फुडल्यान दवरून पोटल्यां सयत बायलांक सांभाळून घरा पावोपाचें काम पायलट करताले. दर सुक्रारच्या बाजाराक पायलटाचें हे भाडें थारायल्लें आसतालें. वांटेर वयतना कितल्योश्योच गजाली जाताल्यो आनी घरा केन्ना पावलें तें कळ लेगीत नासलें. गोंयच्या बारीक मोट्या, खडबडीत मातयेच्या रस्त्यांचेंर कलाकुसरीन मोटार सायकल धांवडावन प्रवाशांक आपल्या मुक्कामाचेर पावोवपाचे जापसालदारकेन पायलट करताले.
1979 वर्सा ह्या पायलटांचे गोंय मोटार वाहन चलोवप्याचें मंडळ स्थापन जालें आनी 1980 उपरांत तें कार्यरत जालें. ते वेळार पयल्या किलोमिटराक पन्नास पयशे (आठ आणें) आनी ताच्या फाटल्या दर एका किलोमिटराक पंचवीश पयशे (चार आणे) असो दर आसलो. पयशां परस पायलटांचेर आसललो लोकांचो विश्वास तांची खरी कमायी आसली.
शाळेंतल्यान भुरग्यांक खंयच्याय दिसा हाडपाक मेळना जाल्यार पायलटा कडेन रकाद दवरल्यार पायलट जुस्त शाळा सुट्टल्या वेळार वचून भुरग्याक घरा हाडून सोडटालो. इतलो विश्वास आतां सोदून लेगीत मेळचोना. रेंट अ बाइक ह्या नांवा आड गोंयच्या पायलटाचें अस्तित्व ना जावपाचे वांटेर आसा. हळदुव्या काळ्या रंगाच्यो चार चाकी भारतांतल्या सगळ्याक पळोवपाक मेळटात. ह्या रंगाच्यो मोटारसायकली फक्त गोंयांतच पळोवपाक मेळटात.
प्रिता परब
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
