गोंयांतल्या फार्मा उत्पादन निर्यातींत वाड

भांगरभूंय | प्रतिनिधी

पणजी: फाटल्या तीन वर्सांत गोंयांतल्या फार्मास्युटीकल उत्पादनांच्या निर्यातींत वाड जायत आसा. अर्थीक वर्स 2021-22 चे तुळेन 2023-24 वर्सा गोंयच्यान जाल्ल्या फार्मास्युटीकल उत्पादनांचे निर्यातींत सुमार 1505 कोटी रुपयांची वाड जाल्या. केंद्रीय रसायनां राज्यमंत्री अनुप्रिया पटेल हांचे जापेंतल्यान ही म्हायती मेळ्ळी. हे विशीं खासदार संतोष कुमार पी हांणी राज्यसभेंत अतारांकीत प्रस्न उपस्थीत केल्लो.

जापेंत दिल्ले म्हायती प्रमाण गोंयच्यान 2021-22 वर्सा पांच हजार 22 कोटी रुपयांची फार्मास्युटीकल उत्पादनांची निर्यात जाल्ली. 2022-23 वर्सा तातूंत सुमार 300 कोटींची वाड जावन 5 हजार 329 कोटींची निर्यात जाली, जाल्यार 2023-24 वर्सा 6 हजार 527 कोटी रुपयांच्या फार्मास्युटीकल उत्पादनांची निर्यात जाली. 2023-24 वर्सा फार्मा उत्पादन निर्यातींत गोंय देशांत सातव्या स्थानार उरलें. ह्या वर्सा सगल्यांत चड 29 हजार 148 कोटी रुपयांची निर्यात तेलगणांतल्यान जाल्ली.

अर्थीक वर्स 2021-22 आनी 2022-23 वर्सा लेगीत गोंय फार्मा उत्पादन निर्यातींत देशांत सातव्या स्थानार आशिल्लें. पुराय देशाचो विचार करीत जाल्यार अर्थीक वर्स 2021-22 त फार्मास्युटीकल उत्पादनाची निर्यात ही 82 हजार कोटी रुपयांची आशिल्ली. 2022-23 वर्सा 1 लाख कोटी जाल्यार 2023-24 वर्सा 1.15 लाख कोटी रुपयांच्या फार्मास्युटीकल उत्पादनांची निर्यात जाल्ली. भारतीय मार्केटांत फार्मास्युटीकल उत्पादनांचें मोल सादारणपणान 50 अरब अमेरिकन डॉलर आसा.

जापेंत म्हणलां की, सद्या देशांत सुमार 23.5 अरब अमेरिकन डॉलर मोलाचीं फार्मास्युटीकल उत्पादनां वापरतात. फार्मास्युटीकल उत्पादन निर्यातींत भारत संवसारांत तिसऱ्या स्थानार आसा. तशेंच देशांत किफायतशीर दरांतली सुमार 60 हजार जेनरीक वखदां तयार करतात. पुराय संवसारांत निर्यात जावपी एकूण जेनरीक वखदां पैकीं 20 टक्के देशांतल्यान निर्यात जातात.