भांगरभूंय | प्रतिनिधी
पणजीः उत्सव काळांत विघ्न येवचें न्हय हे खातीर पुलिसांक सतर्क रावचें पडटा. ताका लागून घरांतले चवथी पसून पुलीस पयस उरतात. हे खातीर पुलिसांक चवथ मनोवपाक मेळची हे खातीर गोंयांतल्या 18 पुलीस स्टेशनांनी चवथ मनयतात.
उत्तर गोंयांतल्या 13 पुलीस स्टेशनां मदल्या 8 जाल्यार दक्षीण गोंयांत 16 पुलीस स्टेशनां मदल्या 10 पुलीस स्टेशनांचेर म्हणल्यार वट्ट 18 पुलीस स्टेशनांचेर गणपती पुजतात.
पुलीस स्टेशनांचेर 9 ते 11 दीस चवथ मनयतात. कांय पुलीस स्टेशनांचेर पुलीस स्वता पयशे मोडून चवथ मनयतात जाल्यार कांय पुलीस स्टेशनांचेर देणगीच्या रुपान आयिल्ल्या पयशांतल्यान चवथ मनयतात. ते भायर आल्तिना वयल्या गोंय राखीव पुलीस दळांत 11 दीस गणपती पुजतात.
पुर्तुगेजां पासून गोंयाक मुक्ती मेळ्ळे उपरांत उत्तर गोंयांत पेडणें, दिवचल, म्हापशें आनी वाळपय जाल्यार दक्षीण गोंयांत सांगें, केपें, मडगांव आनी काणकोण ह्या पुलीस स्टेशनांचेर कर्नाटक आनी महाराष्ट्रांतले चड करून कोंकणांतले पुलीस गोंयांत येताले. त्या पुलिसांक चवथीच्या काळांत घरा वचपाक मेळानाशिल्लें. ताका लागून तांणी गोंयांत पुलीस स्टेशनांनी चवथ मनोवपाची परंपरा सुरू जाल्ल्याची म्हायती मेळ्ळ्या. गोंयांत चड करून कुटुंबीक, भौशीक आनी सरकारी अशा तीन पांवड्याचेर चवथ मनयतात. तातूंतल्या सरकारी पांवड्याचेर पुलीस, उजो पालोवपी दळ आनी हेर कार्यालयांनी चवथ मनयतात. चवथीच्या काळांत मेळपी पयशांतल्यान पुलीस स्टेशनांत समाज उपेगी वस्तू खरेदी करतात. कांय पुलीस स्टेशनांनी खर्च उणो करचे खातीर डिजे, बँजो बँड आनी हेर खर्च बंद करून परंपरीक दिंडी आनी भजन सुरू केलां.
पुलीस स्टेशनां आनी चवथीचे दीस
पणजी 9, पर्वरी 9, पेडणें 11, म्हापशें 11, दिवचल 11, वाळपय 9, कळंगूट 9, हणजूणें 11, मडगांव 11, कुंकळ्ळी 11, कुडचडें 11, सांगें 11, काणकोण 11, वास्को 11, मुरगांव 11, कुळें 11, केपें 11, वेर्णें 9 दीस.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
