गोंयांतल्या दिव्यांग व्यक्तींचो बेगिनूच डाटा तयार करतलेः सुभाष फळदेसाय

भांगरभूंय | प्रतिनिधी

– 300 परस चड दिव्यांगांक मुफत कृत्रीम पांय दिवपाची येवजण

पणजीः राज्यांतल्या दिव्यांग व्यक्तींचो डाटा बेगिनूच तयार करतले. दरेक वाठारांत कितले दिव्यांग आसात, तांचे मदीं कितले टक्के दिव्यांग आसात, हाचे सयत तांचे शिक्षण, पिराय, कुशळटाय हे विशींची म्हायती ह्या डाटात उपलब्ध आसतली, अशें सांगून, दिव्यांगांक सरकारी नोकरेची संद दितना हो डाटा म्हत्वाचो थारतलो, असो विस्वास समाज कल्याण खात्याचे मंत्री सुभाष फळदेसाय हांणी उक्तायलो.

राज्यांतल्या पांय नाशिल्ल्या व्यक्तीं खातीर खात्या वतीन मुफत कृत्रीम पांय दितले. हे विशीं मंगळारा पणजे घेतिल्ले पत्रकार परिशदेंत ते उलयताले. ह्या वेळार तांचे वांगडा दिव्यांग आयोगाचे आयुक्त गुरूप्रसाद पावस्कार, समाज कल्याण खात्याचे संचालक अजीत पंचवाडकार, नीरज सक्सेना हे मानेस्त हजर आशिल्ले.

विवीध कारणांक लागून पांय वगडायिल्ल्या दुयेंतींक मुफत कृत्रीम पांय दिवपा खातीर भारत पेट्रोलियमान दोन कोटींचें कृत्रीम पांय उपल्बध करून दिल्यात. हातूंत पांय नाशिल्ल्या 300 परस चड जाणांक कृत्रीम पांय मुफत दिवप शक्य जातले. आतां मेरेन 120 जाणांनी नोंदणी केल्या. ताका लागून सगल्या लोकप्रतिनिधींनी आपापल्या वाठारांतल्या अशा दुयेंतींची म्हायती समाज कल्याण खात्याक दिवन तांकां कृत्रीम पांय मेळोवन दिवचे, असो उलो मंत्री फळदेसाय हांणी केला.

राज्यांतल्या दिव्यांग नागरिकांक गरजेचीं ती सगलीं उपकरणां मुफत दिवपाची मोहीम राज्य सरकारान आंखल्या. कांय म्हयन्यां पयलीं पर्पल फेस्त कार्यावळीच्या माध्यमांतल्यान राज्यभरांतल्या दिव्यांग नागरिकांक गरजेचीं ती सगलीं उपकरणां सरकारान मुफत दिल्यात. दिसाक 300 ते 350 जाणांक व्हिलचॅर आनी हेर साहित्य दिलां, अशें तांणी सांगलें.

पर्पल फेस्ताचे सकारात्मक परिणाम

गोंयांत आयोजीत पर्पल फेस्ताचे जायते सकारात्मक परिणाम जाल्यात. ह्या कार्यावळी उपरांत उद्देग, संघटणा, आपसेवी संस्था दिव्यांगांक सहकार्य करपा खातीर सरकारच्या फाटल्यान उब्यो रावल्यात. अपघात, दुयेंस अशा कारणांक लागून पांय वगडायिल्ल्या नागरिकांक हेरांच्या आदाराचेर जगचे पडटा. तातूंतल्यान तांची सुटका करपा खातीर आनी फुडारांत जीण पर्जळीत करपा खातीरूच कृत्रीम पांय दिल्यात, अशें मंत्री फळदेसाय हांणी नमूद केले.