भांगरभूंय | प्रतिनिधी
प्रधानमंत्री दिव्यांशा केंद्राचें उक्तावण
भांगरभूंय । प्रतिनिधी
पणजीः गोंयांतल्या दिव्यांगांक अदीक सक्षम करचे खातीर तांकां फुकट उपकरणां दितले. ते खातीर बुधवारा गोमॅकाँत प्रधानमंत्री दिव्यांशा केंद्राचें उक्तावण केलें. ह्या वेळार मुख्यमंत्री डॉ. प्रमोद सावंत, आमदार दिगंबर कामत, राज्य दिव्यांगजन आयुक्त गुरुप्रसाद पावसकार आनी हेर मानेस्त हाजीर आशिल्ले. ह्या केंद्रा वतीन डिजिटल आयकुपाचें यंत्र, स्मार्ट केन्स, स्मार्टफोन आनी हेर सहायक उपकरणां दितले.
मुख्यमंत्री डॉ. प्रमोद सावंत हांणी सांगलें, हें केंद्र दिव्यांगजनांक तात्पुरत्या आनी कायमस्वरुपी अश्या दोनूय तरांचो आदार दितलें. गोंयांतल्या दिव्यांग समुदायाची जीण सुदारवचे खातीर हो एक म्हत्वाचो पांवडो थारतलो. दिव्यांग समुदायाचें सक्षमीकरण करपाच्या उद्देशान हें केंद्र सुरू केलां. ह्या केंद्राची मोख गोंयांतल्या दिव्यांगजनां खातीर वन- स्टॉप डेस्टिनेशन करपाचें आसा. हो उपक्रम सर्वसमावेशक गोंय निर्माण करपाचे दिशेन एक म्हत्वाचें पावल आसा. केंद्रा वतीन दिव्यांगजन आनी ज्येश्ठ नागरीक ह्या दोगांकूय सहायक उपकरणां दितलें. हें केंद्र भारतीय कृत्रीम अवयव निर्मिती म्हामंडळ (अलीमकॉ), भलायकी खातें, समाज कल्याण खातें आनी राज्य दिव्यांगजन आयोग हांचो एकवटीत उपक्रम आसा, अशें मुख्यमंत्र्यान सांगलें.
कण्याच्या दुयेंती खातीर रिहॅबिलिटेशन केंद्र
रुग्णाश्रय, बांबोळे कण्याची दुखापत जाल्ल्यां खातीर मुख्यमंत्री डॉ. प्रमोद सावंत हांणी रिहॅबिलिटेशन केंद्राचें उक्तावण केलें. कण्याचे दुखापतींतल्यान बरें जाल्ल्या दुयेंतींक थंय फुकट उपचार मेळटले.
देशाची दिशा गोंयांतल्यान थारतली
पर्पल फेस्टांत जावपी विवीध परिशदेंतल्यान दिव्यांगां खातीर धोरण थारायतले. हीं धोरणां फुडें केंद्र सरकाराक धाडटले. तातूंतल्यानूच पुराय देशांतल्या दिव्यांगा खातीरचें धोरण थारायतले. एका अर्थान देशांतल्या दिव्यांगांच्या धोरणाची दिशा गोंयांतल्या थारतली, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
