भांगरभूंय | प्रतिनिधी
तुर्कीन पाकिस्ताना वटेन भुमिका घेतिल्ल्यान रियल इस्टेट कंपनीन घेतलो निर्णय
पणजी ः तुर्कीन पाकिस्ताना वटेन भुमिका घेतिल्ल्यान ‘गोवा व्हिलास’ रियल इस्टेट कंपनीन गोंयांतल्या तुर्की पर्यटकांक रावपाक घर दिवंक न्हयकार दिला. हालींच्या काळांत तुर्कीन पाकिस्ताना कडेन लश्करी सहकार्य वाडयला अशीं खबर मेळ्ळ्या.
तुर्की सरकार झुजांत पाकिस्तानाक लश्करी उपकरणां आनी राजनैतिक आदार दिवंक शकता असोय अदमास आसा. हे फाटभुंयेर गोंयांतल्या ‘गोवा व्हिलास’ रियल इस्टेट कंपनीन गोंयांतल्या तुर्की पर्यटकांक रावपाक घर दिवंक न्हयकार दिला.
गोवा व्हिलास आनी गो होमस्टे ह्या रियल इस्टेट कंपनींनी आतां तुर्की नागरिकांक सेवा दिवचे नात अशी घेशणा केल्या. सोशल मिडिया प्लॅटफॉर्म एक्साचेर केल्ल्या पोस्टांत गोवा व्हिलास कंपनीन म्हणलां, तुर्कीन पाकिस्ताना वटेन भुमिका घेतिल्ल्यान हो निर्णय घेतलां. तशेंच आमच्या देशा वटेन आमी उबे रावतात अशें तांणी सांगलें.
भारतांत तुर्की नागरिकांचेर कसलीच अधिकृत बंदी नासली तरी खाजगी भारतीय वेवसाय तुर्की नागरिकांक सेवा दिवपाक न्हयकार दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
