गोंयांतल्या जोडपी, आयकर भरपी बायलांचो आंकडो वाडलो

भांगरभूंय | प्रतिनिधी

पांच वर्सांत आयकर भरपी बायलांचो आंकडो 12 हजारां परस चड

पणजी ः फाटल्या कांय वर्सांत राज्यांत जोडपी बायलांचो आंकडो वाडला. ताका लागून कर भरपी बायलांचोय आंकडो दर वर्सा वाडत आसा. फाटल्या पांच वर्सांत आयकर भरपी गोंयकार बायलांचो आंकडो 12 हजारां परस चड वाडला.
गोंयच्या 80 हजार 262 बायलांनी 2019-20 अर्थीक वर्सा आयकर भरिल्लो. 2023-24 वर्सा हो आंकडो 12 हजार 364 वाडून 92 हजार 626 इतलो जालो. 2023-24 वर्सा बायलां करदात्यांचो आंकडो पांच वर्सांतलो हो सगळ्यांत चड आसा. 2020-21 वर्सा उपरांत दर वर्सा बायलां करदात्यांचो आंकडो वाडत आसा. 2020-21 वर्सा 76 हजार 950, 2021-22 वर्सा 80 हजार 230, आनी 2022-23 वर्सा 84 हजार 942 बायलांनी आयकर भरिल्लो.
पुराय देशाचो विचार केल्यार फाटल्या पांच वर्सांत आयकर भरपी बायलांचो आंकडो सुमार 46.29 लाखांनी वाडलो. 2019-20 वर्सा 1.83 कोटी, 2020-21 वर्सा 1.82 कोटी, 2021-22 वर्सा 1.94 कोटी, 2022-23 वर्सा 2.10 कोटी, आनी 2023-24 वर्सा देशभरांतल्या 2.29 कोटी बायलांनी आयकर भरिल्लो. 2023-24 वर्सा आयकर भरपी बायलांचो आंकडो पांच वर्सांतलो सगळ्यांत चड आसा. 2023-24 वर्सा महाराष्ट्रांतल्या चडांत चड 36.83 लाख बायलांनी आयकर भरलो अशें अहवालांत म्हणलां.
केंद्रीय अर्थ खात्यान जारी केल्ल्या वेगवेगळ्या अहवालां प्रमाण फाटल्या पांच वर्सांत राज्यांतल्यान एकठांय जावपी आयकरांत वाड जाल्या. अर्थीक वर्स 2019-20 वर्सा गोंयांतल्यान 2,170 कोटी रुपया आयकर एकठांय जाल्लो. 2023-24 वर्सा तो वाडून 3,867 कोटी रुपया जाला. राज्यांतल्यान 2020-21 वर्सा 2,655 कोटी, 2021-22 वर्सा 2,879 कोटी, आनी 2022-23 वर्सा 3,379 कोटी रुपया आयकर एकठांय जालो.