गोंयांतल्या कांय मुखेल न्हंयां सयत हेर उदकाचे स्रोत प्रदुशीत

भांगरभूंय | प्रतिनिधी

प्रदुशण नियंत्रण मंडळ अहवाल

भांगरभूंय । प्रतिनिधी

पणजी : राज्य प्रदुशण नियंत्रण मंडळान मार्च 2024 ते एप्रील 2025 ह्या काळांत गोंयांतल्यो न्हंयो, तळीं, खाडयो, झरे, धरणां, दर्यादेगो तशेंच बांयच्या उदकाच्या नमुन्यांची तपासणी केल्ली. ह्या नमुन्यांतल्या 30 ते 50 तरांचें प्रदुशण घटकांची मेजणी केल्ली. तातूंत मुखेल न्हंयां सयत हेर उदकाच्यो सुवातो कांय वेळार प्रदुशीत आशिल्ल्याचें दिसून आयलें. जाल्यार कांय वेळार थंयचें प्रदुशण मर्यादेंत आशिल्ल्याचें दिसलें. कांय कडेन उदकाचो पीएच, उदकांतल्या प्राणवायुचें प्रमाण मर्यादे परस उणें जालां, जाल्यार कांय कडेन फिकल कॉलिफॉर्म ह्या घातक जिवाणूंचें वाडिल्ल्याचें दिसून आयलें.

केंद्रीय प्रदुशण नियंत्रण मंडळाच्या नेमा प्रमाण राज्य प्रदुशण नियंत्रण मंडळान 2024-25 त वट्ट 115 उदकाच्या सुवातां वयल्यान उदकाचे 1263 नमुने एकठांय केल्ले. 115 तल्या 107 सुवातांचेर दर म्हयन्याक तपासणी केली. ह्या 115 मदल्या उत्तर गोंयांत 54 जाल्यार दक्षीण गोंयांत 61 सुवातांचो आस्पाव आशिल्लो. तातूंत न्हंयो, तळीं, बांयो, झरे हांचे सयत 20 दर्यादेगा वयल्या उदकाची तपासणी केल्ली. जाल्यार कांय उद्देगीक वसणुकेंतल्या 8 कडेन जमनी पोंदच्या उदकाची तपासणी केल्ली. ही तपासणी स म्हयन्यांतल्यान एकदां केल्ली.

राज्य प्रदुशण नियंत्रण मंडळाच्या अहवाला प्रमाण मार्च 2024 ते एप्रील 2025 ह्या  काळांत मांडवी, साळ, व्हाळवाट, जुवारी, शापोरा ह्यो न्हंयो, कोलवा खाडयेंतल्या उदकाच्या नमुन्यांत खूब खेपे फिकल कॉलिफॉर्म ह्या जिवाणूंचें प्रमाण वाडिल्ल्याचें स्पश्ट जाल्लें. फिकल कॉलिफॉर्माचें प्रमाण चड आशिल्लें उदक पियेल्यार पोटाचीं दुयेंसां जावपाक शकतात. तशेंच बायणा, बांबोळी, मिरामार, बागा, कळंगूट, मोरजी, मोबोर, गालजीबाग, कोलवा, बाणावली, बेताळभाटी, वार्का, आगोंद, पाळोळें, राजबाग, वेळसांव, वागातोर, हरमल, बोगमाळो ह्या दर्यादेगे वयल्या उदकांत फिकल कॉलिफॉर्माचें प्रमाण मर्यादे परस अदीक दिसून आयलें.

बेतोडेंचो व्हाळ, सांतिनेज खाडी, म्हापशें न्हंयेच्य उदकांतलें प्राणवायुचें प्रमाण खूब खेपे उणें जाल्ल्याचें दिसलें. जाल्यार बायो कॅमिकल ऑक्सिजन डिमांड (बीओडी) प्रमाणा भायर वाडलां. पीएचचें प्रमाण उणें जाले उपरांत उदकांतलें आम्ल गुणधर्म वाडटात. हाका लागून उदकांतल्या जिवां खातीर भलायकेक धोको पावपाची शक्यताय आसता. अहवाला प्रमाण खांडेपार तळें, रायतळें, पिळर्ण तळें हांच्या उदकाच्या नमुन्यांत कांय खेपे पीएचचें प्रमाण उणें जाल्ल्याचें दिसलें. कुडका तळ्यांतले एसएआरचें प्रमाण 12 मदले 2 म्हयने मर्यादे परस तिपटी परस अदीक आशिल्लें. एका वर्सांत गोंयांतल्यो चडश्यो बांयो आनी बोअर वेलांनी उदकांतल्या प्राणवायुचें प्रमाण उणें जाल्यार बीओडीचें प्रमाण अदीक आशिल्लें.

साळ न्हंयेंतलें फिकल कॉलिफॉर्म सुमारा भायर

अहवाला प्रमाण 12 मदले 8 म्हयने साळ न्हंयेंतलें फिकल कॉलिफॉर्म मर्यादे परस 10 पटींनी अदीक आशिल्लें. हाची दर 100 मिलीलिटरांत 100 वा ताचे परस उणी आसा. साळ न्हंयेंत 8 म्हयने फिकल कॉलिफॉर्म 1300 ते 1700 दर 100 मिलीलिटर मेरेन पाविल्लें. बायणा दर्यादेगेर 10 म्हयने फिकल कॉलिफॉर्म मर्यादे परस चड आशिल्लें. थंय सप्टेंबर 2024 त फिकल कॉलिफॉर्म 350 दर 100 मिलीलिटर आशिल्लें.

हरवळे घसघसो तीन म्हयने प्रदुशीत

हरवळे घसघशांतल्या उदकांत तीन म्हयने वट्ट कॉलिफॉर्म मर्यादे परस चड आशिल्लें. थंय कॉलिफॉर्म मर्यादे दर 100 मिलीलिटरांत 5000 वा ताचे परस उणें आसा. हरवळ्या दर 100 मिलीलिटर ऑगस्टांत 7900, सप्टेंबरांत 9400 जाल्यार ऑक्टोबरांत 5400 वट्ट कॉलिफॉर्म सांपडिल्लें.