भांगरभूंय | प्रतिनिधी
-कोरगूट तांदळा सयत दोन जातीच्या आंब्यांचो आस्पावपणजीः कोनगूट तांदूळ, मुसराद आनी मांगेलाल आंबो, कोकोनट क्राफ्ट, ताळगांवची वांयगी आनी काजू सफरचंद अशा गोंयच्या आनीक स वस्तूंक जीआय मानांकन मेळोवपाचो मार्ग सोंपो केला. जीआय निबंधकांनी हे सगले स गजाली परिक्षे उपरांत मान्य केल्यात आनी हे संबंदी अतिरिक्त कागदपत्रां सादर करपाची सुचोवणी दिल्या. देखून फुडल्या चार ते पांच म्हयन्यांत ह्या स वस्तूंकय जीआय मानांकन मेळटलो अशें विज्ञान आनी तंत्रज्ञान मंडळाचे अधिकारी दीपक परब हांणी सांगलें.
जीआय रेटिंगा संबंदी फाटल्या नोव्हेंबरांत जाल्ले बसकेंत गोंयान जीआय रेटिंगा खातीर कोरगूट तांदूळ, मुसराद आनी मांगेलाल आंबे, कोकोनट क्राफ्ट, ताळगांवची वांयगी आनी काजू सफरचंद अशीं स वस्तू शिफारस केल्याे. तांचो अर्ज जीआय निबंधकांनी मान्य केला आनी हे संबंदी अतिरिक्त कागदपत्रां सादर करपाची विनवणी केल्या. तांची मान्यताय मेळ्ळ्या उपरांत 90 दीस हो प्रस्ताव हरकती खातीर उक्तो दवरतात. ह्या काळांत हरकत ना जाल्यार संबंदीत वस्तूं खातीर जीआय दर्ज्याचें प्रमाणपत्र रोखडेंच जारी करतात. देखून फुडल्या चार पांच म्हयन्यांत ह्या सगल्या स वस्तूंक जीआय दर्जो मेळटलो असो उल्लेख परब हांणी केला. मजगतीं, हाचे आदीं गोंयांतल्यान सकयल दिल्ल्या वस्तूंक जीआय मानांकन मेळ्ळा. हातूंत खोला मिरसांग, हरमल मिरसांग, काजू, मायंडोळी केळी, गोंयचें खाजें, गोंय मनकुराद, गोंय काजू, आगशी वांयगी, सातशिरांचें भेंडें, आनी गोंय बेबिन्का हांचो आस्पाव आसा.
……………………………..
जीआय रेटिंग म्हणल्यार कितें? कित्या खातीर म्हत्वाचें?
– जर एकाद्र्या उत्पादनाची लागवड एका विशिश्ट वाठारांत जाता आनी ताची विशिश्ट वळख आसत जाल्यार ताका जीआय रेटिंग दितात.
– खंयच्याय उत्पादनाक जीआय रेटिंग मेळ्ळें जाल्यार त्या उत्पादनाची उत्पत्ती थारायतात. इतलेंच न्हय जाल्यार फायदो आनी दर्जो तिगोवन दवरपाक उत्पादकांक फायदो जाता.
– जीआय रेटिंग उत्पादन आनी प्रदेशा कडेन जोडिल्लें आसता. कारण वेगवेगळ्या सुवातींनी तयार केल्लें एकूच उत्पादन वेगवेगळ्या भौगोलिक परिस्थितीक लागून वेगवेगळ्या दर्जाचें आसूं येता. देखून गुणवत्तेची मान्यताय तिगोवन दवरपा खातीर हें रेटिंग म्हत्वाचें.
– जीआय मानांकनान उत्पादकाक जायते हक्क मेळटात. तशेंच, मिलावटी केल्ल्या उत्पादनांचें उत्पादन आनी विक्रीचेर आळाबंदा हाडूंक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
