भांगरभूंय | प्रतिनिधी
मडगांव : मुख्यमंत्री देरदर्शन येवजणे खाला अंदूंची निमाणी रेल्वे 1500 भाविकां सयत अयोध्ये खातीर सुटली. भाविकांची संख्या वाडिल्ल्यान दोन डबे वाडयिल्ले. अंदूं वालंकिनी खातीर एक आनी अयोध्ये खातीर तीन अश्यो चार रेल्वे सोडल्यो.
मडगांव रेल्वे स्टेशना वयल्यान सोमारा दनपारां नावेलीचे आमदार उल्हास तुयेंकार हांचे हाजिरेंत ही गाडी अयोध्ये खातीर सुटली. मुख्यमंत्री देवदर्शन यात्रेच्या निमतान आयोजीत केल्ले कार्यावळीक आमदार उल्हास तुयेंकार, समाजकल्याम खात्याचे संचालक दीपक देसाय, वास्कोची नगरसेविका श्रद्धा आमोणकार, मगडांवची नगरसेविका सुनिता पराडकार, विजय सुरमे हाजीर आशिल्ले.
आमदार तुयेंकार हांणी सांगलें, मुख्यमंत्री देवदर्शन येवजणेचो फायदो व्हड प्रमाणांत गोंयांतल्या लोकांक जाता. हाचें स्रय मुख्यमंत्री डॉ. प्रमोद सावंत, मंत्री सुभाष फळदेसाय हांचे सयत गोंय सरकाराक वता. खूबश्या लोकांक देवदर्शना खातीर वचपाचें आसता, पूण तें तांकां शक्य जायना. मात गोंय सरकारान हे येवजणेच्या माध्यमांतल्यान लोकांक देवदर्शनाची संद उपलब्ध करून दिल्या.
हे येवजणेचो लाव गोंयांतल्या सामान्य लोकांक जाता. हाचे आदीं देवदर्शना खातीर वचून आयिल्ल्या लोकांनी येवपा वचपाचे सुविधे सयत जेवण, रावपाच्यो आनी देवदर्शना खातीरची वेवस्था बरी आशिल्ल्याच्यो प्रतिक्रिया दिल्यात. गोंय सरकारान अंदूं एक रेल्वे वालंकिनी खातीर जाल्यार अयोध्ये खातीर ही तिसरी रेल्वे धाडल्या, अशें सांगलें. मडगांव स्टेशना वयल्यान सोमारा सुटिल्ली रेल्वे 4 फेब्रुवारीक सकाळीं अयोध्येक पावतली आनी रातीं उसरां अयोध्यें सावन परतून येवपाक सुट्टली. हे केल्वेंतल्यान 1500 भावीक गेल्यात, ते 6 फेब्रुवारीक गोंयांत पावतले. अंदूं मुख्यमंत्री देवदर्शन येवजणे खातीर 10 कोटी रुपयांच्या निधीची तजवीज केल्ली. तातूंत पोरूंच्या येवजणेची दोन कोटींची थकबाकी दिल्या आनी उरिल्ल्या 8 कोटींच्या निधींतल्यान अंदूं अयोध्या आनी वालंकिनी देवदर्शना खातीर दोन गाडयो सोडिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
