भांगरभूंय | प्रतिनिधी
एनसीआरबीचो अहवाल
भांगरभूंय । प्रतिनिधी
पणजी : 2023 त गोंयांतल्यान 553 व्यक्ती बेपत्ता जाल्ल्याची कागाळ पुलिशेंत नोंद केल्ली. तातूंत 310 दादले, जाल्यार 243 बायलो आशिल्ल्यो. 2023 च्या निमाणे मेरेन हे आदींच्या वर्सांतल्या तशेंच 2023 ह्या वर्सांतले मेळून 277 दादले जाल्यार 230 बायलो अश्या वट्ट 507 जाणांक सोदून काडपाक वा तांची म्हायती काडपाक येस आयलां. जाल्यार 975 जाणांचो सोद लागूंक नाशिल्लो. राष्ट्रीय गुन्यांव नोंदणी विभागान (एनसीआरबी) हालींच उजवाडायिल्ल्या अहवालांतल्यान ही म्हायती मेळ्ळ्या.
अहवाला प्रमाण 2023 च्या निमाणे मेरेन गोंयांतल्यान वट्ट 1482 व्यक्ती बेपत्ता आशिल्ल्यो. तातूंत 963 दादले जाल्यार 519 बायलो आशिल्ल्यो. बेपत्ता बायलो सांपडपाचें प्रमाण 44.3 टक्के जाल्यार दादल्यांचें प्रमाण 28.8 टक्के आशिल्लें. बेपत्ता व्यक्ती सांपडपाचें वट्ट प्रमाण 34.2 टक्के आशिल्लें. हाची राष्ट्रीय सरासरी 53.8 टक्के आशिल्ली. केरळ, नागालॅण्ड, तेलंगणा, आसाम ह्या राज्यांनी हेंच प्रमाण 80 टक्क्यां परस चड आशिल्लें. जाल्यार ओडिशा, पंजाब, गोंय, झारखंड राज्यांत शेणिल्ल्यो व्यक्ती सांपडपाचें प्रमाण तुळेंत उणें आशिल्लें.
2023 च्या निमाणे मेरेन गोंयांतलीं 18 वर्सां पिराये सकयलीं 48 भुरगीं बेपत्ता आशिल्लीं. तातूंत 28 चले जाल्यार 20 चलयांचो आस्पाव आशिल्लो. पुलिसांनी 2023 च्या निमाणे मेरेन हे आदींच्या वर्सांतल्या तशेंच 2023 ह्या वर्सांतले मेळून 9 चले आनी 8 चलयो अश्या वट्ट 17 जाणांक सोदपाक वा तांची म्हायती काडपाक येस आयलां. बेपत्ता चले सांपडपाचें प्रमाण 32.1 टक्के जाल्यार चलयो सांपडपाचें प्रमाण 40 टक्के आशिल्लें. 18 वर्सां पिराये सकयलीं भुरगीं सांपडपाची राष्ट्रीय सरासरी 65.9 टक्के आशिल्ली. केरळ, त्रिपुरा राज्यांत हेंच प्रमाण 90 टक्क्यां परस चड आशिल्लें.
एका वर्सांत अपहरणाचे 85 गुन्यांव नोंद
गोंयांत 2023 त अपहरण आनी पळोवन व्हेल्ल्या प्रकरणांत 85 गुन्यांव नोंद जाल्यात. तातूंत 53 बायलो आनी 32 दादल्यांचो आस्पाव आशिल्लो. आदली आंकडेवारी धरून 2023 च्या निमाणे मेरेन गोंयांत वट्ट 155 अपहरम प्रकरणांचो तपास लागूंक नाशिल्लो. तातूंतल्यो 110 बायलो पिडीत आशिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
