गोंयांतल्यान बेकायदेशीर सोऱ्याची तस्करी करपी दोगांक जामीनार सोडले

भांगरभूंय | प्रतिनिधी

सावंतवाडी, ः गोंयांतल्यान बेकायदेशीर रितीन सोऱ्याची तस्करी गोंयां भायर खूबशे फावटीं जाता. अशाच एका प्रकरणांत 4 डिसेंबराक मुंबय- गोंय म्हामार्गाचेर झाराप गांवांत अबकारी खात्यान केल्ल्या तपासणी वेळार 61 लाख 28 हजारांचो म्हाल जप्त केलो. ह्या प्रकरणांत दोगांयचेर गुन्यांव नोंद केलो. आतां ह्या दोगांयची २५ हजार रुपयांच्या सशर्त जामीनाचेर सुटका केल्या.
मेळिल्ले म्हायती प्रमाण, 4 डिसेंबराक ओम प्रकाश गुप्ता (32, घणसोली-मुंबय) आनी शिव लखन केवट (30, गोंदरगढी- रेवा- मध्यप्रदेश) हांकां मुंबय-गोंय म्हामार्गाचेर झाराप गांवांत अबकारी खात्यान तपासणी खातीर आडायले. गाडयेंतल्या म्हालाची चवकशी करतना तांणी सकयल डबे आसात अशें सांगलें आनी तांचीं कागदांय दाखयलीं. ह्या कागदपत्रां विशीं पुलिसांक दुबाव आयले उपरांत गाडयेची तपासणी करतना 940 बॉक्सांनी रॉयल सिलेक्ट डिलक्स व्हिस्की (180 मिलिलीटर), 45,120 प्लास्टीक सील केल्ल्यो बाटल्यो आनी 80 बॉक्सांनी एव्हरग्रीन रिझर्व्ह व्हिस्की (750 मिलिलीटर), 960 कंवचेच्यो बाटल्यो मेळून वट्ट 1020 बॉक्स मेळ्ळें. बाजारांतल्या दरान तांचें मोल सुमार 50 लाख 88 हजार रुपया आसा.
पुलिसांनी ह्या म्हाला वांगडाच येरादारी खातीर वापरिल्लो ट्रक आनी मोबायल फोन सयत वट्ट 61 लाख 28 हजारांचो म्हाल जप्त केला. महाराष्ट्र प्रतिबंध कायदो, 1949 च्या कलम 65 (अ), (ई), 80, 81, 83 आनी 90 खाला दोगांय आरोपीं आड गुन्यांव नोंद करून तांकां अटक केली.
पुलिसांनी दुबावीत ओम प्रकाश गुप्ता, शिव लखन केवट हांकां अटक करून कुडाळाच्या न्यायालयांत हाजीर करून 3 दीस पुलीस कोठीची मागणी केल्ली. मजगतीं, दुबावीतां वतीन अॅडव्होकेट परशुराम चव्हाण हांणी केल्लो युक्तीवाद न्यायालयान मान्य करून पुलीस कोठी न्हयकारून न्यायालयीन कोठी मंजूर केली. फुडें आरोपीच्या वकिलांनी जामीन अर्ज दाखल करून ताचेर युक्तीवाद केलो. तो मान्य करून न्यायालयान दोगूय आरोपींक पंचवीस हजार रुपयांचेर सशर्त जामीनाचेर सोडले.