भांगरभूंय | प्रतिनिधी
राज्यसभेंत केंद्रीय संचार आनी ग्राम उदरगत मंत्रालयाची म्हायती
पणजीः राज्यांत अजून 71 गांवांनी 4 जी मोबायल कनेक्टिव्हिटी पसून वंचीत आसात. जाल्यार राज्यांतले फक्त 25 टक्के नियोजीत गांवांनी 4 जी मोबायल कनेक्टिव्हिटीचो लाव घेतात. जाल्यार राज्यांत 100 परस चड 5 जी मोबायल टॉवर उबे जाल्यात अशी म्हायती केंद्रीय संचार आनी ग्राम उदरगत मंत्रालयान दिल्या.
राज्यसभा खासदार सदानंद शेट तानावडे हांणी राज्यसभेंत विचारिल्ल्या प्रस्नाक केंद्रीय संचार आनी ग्राम उदरगत राज्यमंत्री डॉ. पेमासानी चंद्रशेखर हांणी लेखी जापेंत ही म्हायती दिल्या.
राज्यांत अशे 71 गांव आसात जंय अजून मेरेन 4 जी मोबायल कनेक्टिव्हिटी पांवक ना, आनी 4 जी संतृप्ती प्रकल्पा वरवीं ह्या 71 गांवांनी 4 जी मोबायल कनेक्टिव्हिटी यंत्रणा हाडपाचो विचार चल्ला. तशेंच फेब्रुवारीच्या शेवटाक 18 नियोजीत गांव धरून ह्या 25 टक्के गांवांनी ह्या प्रकल्पा वरवीं 4 जी कनेक्टिव्हिटी पावल्या. दुरसंचार खात्यान गोंयांत दुरसंचार नेम 2024 ची अंमलबजावणी चालू केल्या आनी हे विशींचे सरकारी आदेश राज्यांक धाडल्यात.
तशेंच गोंया सयत पुराय देशभर दुरसंचार सेवा कंपनींनी 5 जी सेवेच्या जाळ्यांचो विस्तार करप चालू केला. गोंयच्या दोनूय जिल्ह्यांनी 111 5 जी मोबायल टॉवर उबे जाल्यात. देशांत 5 जी मोबायल सेवा ऑक्टोबर 2022 वर्सा सुरू जाल्ली आनी देशाच्या 99.6 टक्के जिल्ह्यांनी ही सेवा उपलबध्द आसा. फेब्रुवारीच्या शेवटाक 5 जी नेटवर्क दिवपा खातीर टेलेकॉम कंपनींनी 4.69 लाख 5 जी टॉवर बसयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
