भांगरभूंय | प्रतिनिधी
पणजी : शालान्त मंडळा वतीन घेवपी गोंय शिक्षक पात्रता चांचणी (जीटीईटी) अंदूं 21 आनी 22 जूनाक जातली. हे परिक्षे खातीर वट्ट 3392 उमेदवारांनी नोंदणी केल्या. मुळाव्या पांवड्यार परिक्षे खातीर 919 जाल्यार माध्यमीक/ उच्च मुळाव्या पांवड्या वयले परिक्षे खातीर 2205 उमेदवारांनी नोंदणी केल्या. तशेंच दोनूय परिक्षांक 268 विद्यार्थी बसतले. शालान्त मंडळाचे अध्यक्ष भगिरथ शेट्ये हांणी ही म्हायती दिली.
परिक्षेचे अॅडमीट कार्ड उमेदवारांक ईमेलाचेर धाडलां. आदले परस अंदूं जीटीईटी परिक्षेक बसपी उमेदवारांचो आंकडो चड आसा. शिक्षण हक्क कायदो लागू जाले उपरांत पयली ते आठवी मेरेनच्या शिक्षकांक शिक्षक पात्रताय चांचणी पास जावप गरजेचें आसा. हाका लागून नवे भरती केल्ल्या आनी पयली ते आठवे मेरेन अध्यापन करपी शिक्षकांक ही परिक्षा पास जावपाची अट आसा. तशेंच शिक्षक पदा खातीर अर्ज करप्यांकूय पात्रता निकशांत हे परिक्षेचो आस्पाव आसा. कर्मचारी भरती आयोगा वरवीं आतां शिक्षकांची 118 पदां भरतले. ही परिक्षा जूनांत जावपाची आशिल्ल्यान शिक्षकां खातीर अर्ज करपाची मुजत 15 जुलय मेरेन वाडयल्या. जीटीईटी पयल्या पेपरा खातीर (पयली ते पांचवी मेरेनच्या शिक्षकां खातीर) उण्यांत उणी बारावी पास आनी डी. एड. ही पात्रताय आसा. दुसर्या पेपरा खातीर (सवी ते आठवी मेरेनच्या शिक्षकां खातीर) उण्यांत उणे पदवीधर आनी डी. एड. पास ही अट आसा. बी. एड. धारकूय हे परिक्षेक बसपाक पात्र आसात. दोनूय पेपर 150 गुणांचे आसतले आनी पेपराची वेळ अडेज वरांची आसतली, अशें मंडळान कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
