भांगरभूंय | प्रतिनिधी
म्हजें मत
आमचें गोंय आमकां जाय, गोवा फाॅर गोवन्स, गोंय गोंयकार गोंयकारपण, गोवा आमच्या हक्काचा नाही कुणाच्या बापाचा… अश्यो घोशणा एका काळार गाजताल्यो. सुमार साडेचारशीं वर्सांचे पुर्तुगेज राजवटींतल्यान गोंय मुक्त जालें. उपरांत ताका केंद्रशासीत राज्याचो दर्जो मेळचो म्हूण व्हडलें आंदोलन करचें पडलें. मागीर जनमत चाचणी जावन गोंयचें महाराष्ट्रांत जावपी विलिनीकरण आडायलें. वीस वर्सां उपरांत ल्हानश्या गोंयाक घटक राज्याचो दर्जो मेळ्ळो.
आयज चाळीस आमदार, डझनभर मंत्री, तीन खासदार, दोन जिल्हो पंचायती, लागीं लागीं दोनशें पंचायती, पालिका आनी पन्नास हजारां वयर नोकरशाय ह्या राज्याचो कारभार करता. फक्त 14- 15 लाख लोकसंख्ये खातीर आशिल्ल्यो सरकारी सुविधा गोंयांक फावोश्यो आसात. प्रामाणीकपणान काम केलें जाल्यार सध्या आशिल्ले मनीसबळ ह्या राज्याचो पुराय कायापालट करपाक सक्षम आसा. पूण तशें जातना मात्तूय दिसना.
आमच्या राज्यांत भायल्यांचो हस्तक्षेप नाका म्हणीत आमी आख्खें राज्य तांच्या हातांत केन्ना दिलें तेंय आमकां कळूंक ना. ताचे दुश्परिणाम आयज दिसतात. पेडणे तालुक्यांतल्या मोरजे पंचायतीचे सचिव सचिन धावस्कार हांचेर दिल्लीच्या दोगांनी हल्लो केलो. बाटलेन मारपेट करीत ताचे कपडे पिंजले, जिवेशीं मारपाची धमकी दिली. हो फक्त एकूच प्रसंग न्हय. दिल्ली, हरियाणा, उत्तरप्रदेश, बिहारांतल्या धनदांडग्या बिल्डरांची गोंयांत दादागिरी वाडल्या. गोंयांतले व्हडले व्हडलें जमनीचे प्लाॅट गिळून ते नवे भाटकार जाल्यात. तांकां मजत करपी गोंयचे लाचार एजंट, सरकारी अधिकारी, राजकी फुडारी हे हाका चड जापसालदार आसात.
फक्त सुवार्थी खातीर चूड दाखोवन तांणी हो म्हारु आपल्या घरांत हाडला. फुडाराक कितें जावपाचें आसा ताची झलक फुडल्या सात- आठ वर्सांनी दिसतली. आतां तरी गोंयकारांचे दोळे उक्ते जातले?
– गजानन बा. नायक भाटकार,
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
