भांगरभूंय | प्रतिनिधी
म्हायती राज्यसभेंत सादर
पणजी : गोंयांत १ एप्रील २०२१ ते ३१ मार्च २०२५ ह्या काळांत वट्ट २८०.६५ हॅक्टर रान जमीन विवीध प्रकल्पां खातीर वळयिल्ल्याची म्हायती राज्यसभेंत सादर केली.
केंद्रीय पर्यावरण, आनी रान हवामान बदल मंत्री किर्ती वर्धन सिंग हांणी संसदेंत दिल्ले म्हायती प्रमाण, सुमार ३५ प्रकल्पां खातीर ही जमीन वापरपाक मंजुरी दिल्या.
ह्या प्रकल्पांत विमानतळ उभारप, रस्ते रुंदीकरण, वीज उपकेंद्र, वीज प्रसारण सरयो तशेंच तशेंच रेल्वे दोट्टी मार्गाचो आसपाव आसा. २०२३२४ ह्या वर्सा सगल्यांत चड १७८.१९ हॅक्टर रान जमीन वळयली. २०२०२१त ९७.६५ हॅक्टर जमीन वळयल्लें. हालींच कुळें, मडगांव रेल्वे दोट्टी मार्गा खातीर १५.६ हॅक्टर रान वाठारांतले जमनीक मंजुरी दिल्या.
चालू अर्थीक वर्साय १३ शासकीय आनी खासगी प्रकल्पां खातीर रान जमीन वळोवपाक मान्यताय दिली. मजगतीं, पर्यावरणाचे नदरेन संवेदनशील भागांतल्यान मुळाव्यो सुविधा विस्ताराच्या प्रस्तावांचेरूय चर्चा रंगली. गोंय-बेळगांव महामार्गाच्या ५३ मिटर रुंदीकरणाच्या प्रस्तावाक लागून ७,७७४ झाडां कापची पडटलीं. हो मार्ग भगवान महावीर वन्यजीव अभयारण्यांतल्यान पर्यावरणाचे नदरेन संवेदनशील जमनींतल्यान वता.
रान जमीन वळोवपाचे फाटभूंयेर भरपाय रानरोपणी येवजणे खाला राज्य रान विभागान तीन वर्सांत टप्प्याटप्प्यान ४८७.९८ हॅक्टर वाठारांत लागवड करपाचें नियोजन केलां. तांतलें चालू वर्सा १३० हॅक्टर, जाल्यार २०२६२७ आनी २०२७२८ ह्या वर्सा दरेकी १७८.४९ हॅक्टर वाठारांत लागवड प्रस्तावीत आसा.
फाटल्या वर्सा सप्टेंबरांत केंद्र सरकारान योग्य शासकीय जमीन उपलब्ध नाशिल्ल्याचो दाखलो दीत सधिसुचीत खासगी रान वाठारांत भरपाय रानरोपणी करपाक गोंयांक परवानगी दिल्ली. सध्या राज्यांत ९१.६ चौ.कि.मी. वाठार खासगी रान म्हणून अधिसुचीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
