भांगरभूंय | प्रतिनिधी
अमीत पाटकार : देवेंद्र प्रभुदेसाय हांचो काँग्रेसींत प्रवेश
भांगरभूंय । प्रतिनिधी
पेडणें : गोंयांतलें ‘बावंन्सर कल्चर’ आडावपाची गरज आसा. आमदार मंत्र्यांची दादागिरी चल्ल्या, ती फकत गोंयकारूच आडावपाक शकतात. हे क्रांतीची सुरवात मांद्रें मतदारसंघांतल्यान करुंया. देवेंद्र प्रभुदेसाय हांच्या रुपान एक सक्षम फुडारी पक्षाक मेळ्ळा, अशें काँग्रेस प्रदेशाध्यक्ष अमीत पाटकार हांणी सांगलें.
पार्सेचे आदले सरपंच तशेंच आम आदमी पक्षाचे फुडारी देवेंद्र प्रभुदेसाय हांच्या काँग्रेस प्रवेशा वेळार पाटकार उलयताले. पार्सेच्या श्री भगवती देवस्थानाच्या प्राकारांत आयोजीत केल्ले सभेक मातयेर विरोधी पक्ष फुडारी युरी आलेमांव, केपेंचे आमदार एल्टन डिकॉस्टा, आदले केंद्रीय मंत्री तशेंच आदले उपमुख्यमंत्री अॅड. रमाकांत खलप, प्रदेश काँग्रेसीचे पदाधिकारी प्रदीप देसाय, गणपत कलंगूटकार, पार्सेची पंच सुनिता बुगडे देसाय, पार्वती नागवेकार, वीरेंद्र शिरोडकार, बेलरिन रिचर्ड
फर्नांडीस, मांद्रे गट काँग्रेस अध्यक्ष नारायण रेडकार, पेडणें गट काँग्रेस अध्यक्ष कृष्णा नायक, जगन्नाथ देसाय, रामचंद्र केरकार, मिगेल फर्नांडीस, उत्तम साळगांवकार, अंटोनियो रॉड्रिग्ज, मेलवीन डिकॉस्टा, प्रणव परब, राजेश कोचरेकार, जितेंद्र गांवकार, अभिमन्यू पोळजी हाजीर आशिल्ले.
मांद्रें मतदारसंघांतल्यान 2027 चे वेंचणुकेंत काँग्रेस पक्ष खडेगांठ उमेदवार दिवपाची घोशणा पाटकार हांणी केली. गोंयची अस्मिताय आनी गोंयकारपण सांबाळपा खातीर क्रांतीची मशाल पेटोवन धर्मांध शक्तींक आडावपाची गरज आसा, अशेंय तांणी सांगलें.
मांद्रें मतदारसंघान वेळावेळार इतिहास घडयला आनी काँग्रेसीन दर खेपे सक्षम नेतृत्व दिलां. फुडारांत लेगीत ह्या मतदारसंघांत परिवर्तन जातलें. शर्मा-वर्मांची दादागिरी वाडल्या. ती आडावपाक काँग्रेस सत्तेर येवप गरजेचें आसा, अशें युरी आलेमांव हांणी सांगलें.
एल्टन डिकॉस्टा हांणी सांगलें, दक्षीण गोंयात दर दोन आमदार पक्षाचो लोकसभा उमेदवार वेंचून हाडपाक शकता, आपले सारको सामान्य मनीस उपमुख्यमंत्र्याक हारोवपाक शकता जाल्यार एका काळार काँग्रेसीचो बालेकिल्लो आशिल्ल्या मांद्र्यांत काँग्रेसीचो उमेदवार निश्चीत वेंचून येवपाक शकता, असो विस्वास तांणी उक्तायलो.
अॅड. खलप हांणी सांगलें, बिगर गोंयकारां कडेन वचपी जमनी फुडले पिळगे खातीर राखून दवरतले जाल्यार चडांत चड जमीन धारणा कायदो अस्तित्वांत हाडपाची गरज आसा. हें फकत काँग्रेस पक्षूच करपाक शकता.
देवेंद्र प्रभुदेसाय हांणी पक्ष नेतृत्वाचे उपकार मानले. मांद्रें मतदारसंघांत पक्ष घटमूट करपाचो आपूण फुडल्या दोन वर्सांत यत्न करतलों. आमचे भुंयेर आमी परके जातले, ते खातीर देश विघातक शक्ती आड एकठांय येवपाची तांणी गरज उक्तायली. ह्या वेळार हेर मानेस्तांचींय उलोवपां जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
