भांगरभूंय | प्रतिनिधी
अामच्या गोंयांत पर्यटन नेटान सुरू जालां. परदेशी भोंवडेकार गोंयांत येवंक सुरू जाल्यात. पर्यटनाच्या वेवसायांत आशिल्ले लोक तरेकवार हिकमती वापरतात. तशेंच ह्या पांच म्हयन्यां भितर आपल्याक चडांतचड फायदो कसो जातलो हाचेर आपलें सगळें मन लावन वावुरतात. भोंवडेकरांक आकर्शीत करतलो जाल्यार एक चड सोंपो उपाय म्हणल्यार रातींच्या वेळार नाचपा- उडपाच्यो कार्यावळी घडोवन हाडप. नाचपा – उडपाच्या कार्यावळी घडोवन हाडटले जाल्यार व्हडल्यान संगीताचो वापर करप गरजेचें आसा. रातीच्या वेळार, ह्या दिसांनी, दर्यादेग वाठारांतल्या गांवांनी अदीक करून वेळां देगेक आशिल्ल्या वाठारांनी रातीच्या वेळार नदर मारल्यार हें दिसून येता.
भोंवडेकारांक आपल्या हॉटेलां, रेस्टॉरेन्टांत वा डिस्कोंत ओडून हाडपा खातीर व्हडल्यान संगीत वाजयतात, तें आयकूंक येता. रातचीं एक आनी दोन वरां मेरेन लावड म्यूजिकाच्या आदारान पियेवप आनी नाचप असलें नायट- लायफ गोंयांक जाय म्हण कांय लोक सांगतात. नायट लायफ फुलयतलो जाल्यार लावड म्यूजिक वापरले बगर जायना. दुसऱ्याची मात पर्वा करीनासतना लावड म्यूजिक वा व्हडल्यान संगीत वाजयता हाका लागून मध्य प्रदेश संगीत नियंत्रण कायदो गोंयाक लागू केल्लो आसा. ह्या कायद्या प्रमाणें व्हडल्यान संगीत वाजप रातच्या धा वरांचेर बंद जावंकूच जाय. रातच्या धा वरांचेर व्हडल्यान संगीत वाजोवपाचें बंद केलें जाल्यार नायट लायफय बंद जालें न्हय? हे खातीर आनीक एक फावट कांय हॉटेलांनी गोंयच्या, सरकाराच्या आदारान, केंद्र सरकाराक मागणी करूंक निर्णय घेतला खंय. व्हडल्यान संगीत वाजोवप धा वरांचेर बंद करता. तें मध्यान रातीं बारा वरां मेरेन चालू दवरूंक तांची मागणी आसा खंय..
वायट परिणाम
मध्यान रातीं मेरेन लावड म्यूजिक वापरूंक दिल्यार गोंयांक बऱ्याक पडटलें काय? म्हज्या विचारा प्रमाणें, मूठभर हॉटेलवाले आनी डिस्कोवाले भरपूर दुडू कमयतले. पूण हेरांचेर ताचो वायट परिणाम जातलो. कसो तो नियाळ करूया ?
लावड म्यूजिक रातचीं बारा वरां मेरेन वाजयल्यार पयले सुवातेर थंय रावतल्या भुरग्यांच्या शिक्षणाचेर वायट परिणाम जाता. भुरग्याक शांतीकायेन आपलो अभ्यास करूंक मेळना. आनी भुरगीं शिक्षणांत कमी पडूंक शकता.
घरांनी जायते जाण्टे आनी दुयेंत लोक आसतात. तांकां शांतीची गरज आसा. लावड म्यूजिक वापरलो जाल्यार तांचे भलायकेचेर वायट परिणाम जाता आनी तांची भलायकी सुदारचे सुवातेर अदीक बिगडटा. ह्या संवसारांत आनीक थोडो काळ दुयेंतीक आनी जाण्ट्यांक दिवचे सुवातेर आमी लावड म्यूजिक वाजोवन तांकां त्रास करतात.
दर्याच्या वेळां लागीं आशिल्ल्या सगळ्या गांवांनी गेस्ट हावसीस खूब वाडल्यांत. खरेंपणी प्रत्येक घर एक गेस्ट हावस जालां म्हणल्यार फट जावचें ना. घरांतले थोडे रुम्स भाड्याक दिवंक जायत्यो फामिलीं आपलो दिसवडो सोडयता. पूण जेन्ना व्हडल्यान संगीत रातचीं बारा वरां मेरेन वाजता तेन्ना ह्या घरांनी रावतल्या भोंवडेकारांक सारकें न्हिदूंक मेळना. मातूय सुसेग घेवंक मेळना. ह्या कारणाक लागून दुसऱ्या दिसा भोंवडेकार ते रुम्स सोडटात. दुसरे सुवातेर असली लावड म्यूजिक हाची उंचाबळ ना थंय वतात. नायट लायफ हाचे वरवीं ड्रग्सांचो वापर करप वाडत वता. आनी आमच्या समाजाचेर वायट परिणाम जाता. असल्या हॉटेलांनी आनी डिस्कोंनी जायते फावट झगडीं आनी मारामारी जातात. समजांतलीं कायदो वेवस्था बिगडटा.
गंभीर प्रस्न
हे खातीर एक गंभीर प्रस्न उबो जाता. गोंयांक नायट लायफ गरजेचें आसा काय? रातींची बारा वरां मेरेन लावड म्युजीक वाजोवंक परवानगी फायद्याचें आसा काय.. म्हजे प्रमाणें ना.. व्हडल्यान संगीत वाजोवन दुसऱ्याक त्रासांत घालून, आपणें दुडू जोडप, हें गोंयकारांक मान्य आसा ? ना. ते खातीर मध्य प्रदेश संगीत नियंत्रण कायदो हाच्या प्रमाणें रातच्या धा वरांचेर लावड म्यूजिक बंद जावंक जाय हें सरकारान सांबाळून दवरूंक जाय. जांकां लावड म्यूजिक वापरूंक जाय तांणी आपले डिस्को आनी आपलीं हॉटेलां सावंड प्रूफ करचीं तातूंत फांत्या मेरेन लावड म्यूजिक वाजयल्यार कोणाचीच अडचण आसची ना. मूठभर लोकांच्या फायद्याक लागून अख्ख्या समाजाक त्रासांत घालप ही समाजाचेर एक धरून एक अनीत जातली. ही अनीत सरकारान आधाराची न्हय म्हूण म्हजी मागणी आसा.
लिप्यांतर : विशाल सिनाय खांडेपारकार, 8080622370
तोमाझिन कार्दोज
9822170102
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
