भांगरभूंय | प्रतिनिधी
नामनेचे धर्मगुरू ब्रह्मेशानंद स्वामी हांचो एक व्हिडियो सध्या व्हायरल जाला. तातूंत ते आपले कळंगूट भेटे विशीं सांगतात. थंयची एक लेन पळोवन आपणाक धक्कोच बसलो, तकली सुन्न जाली, काळजांत धस्स जालें. कारण हांव थायलॅण्डांतूच आसा, अशें म्हाका दिसलें. हें गोंयचें खरें चित्र न्हय. पालक आनी शिक्षकांक हात जोडून विनवणी की आमी गोंयाक बरे दीस हाडपाक वावरुया…. अशें ते सांगतात. स्वामीजींचें हें वक्तव्य कोणें वयलेचाराक घेवचे न्हय. कारण ते एक जापसालदार व्यक्ती. तांचे हजारांनी अनुयायी आसात. गोंयांतूच न्हय, तर देशांतूय तांकां मान आसा. म्हणटकच तांणी नेमकें कितें पळयलें, तांकां कितें खटकलें, ताची चवकशी जावंक जाय. कळंगूटे कितें चुकीचें घडटा जाल्यार तें बंद जावपाक जाय. अर्थांत कळंगूटकारांक ते जें कितें उलयल्यात ताचे परस चड खबर आसतलें. थळावे आमदार मायकल लोबो हांणी मात मात्शी वेगळी प्रतिक्रिया दिली. आमचे नदरेक तशें कांय दिसना. पयलीं आसलें तें आमी बंद केलां. पुलीस कडक वागतात. डान्स बार बंद जाल्यात. टावट्सांक धांवडावन घाल्यात. तांणी कळंगूटे कितें पळयलें तें खबर ना. पूण ते जें उलयल्यात ती एक गंभीर गजाल. हांव तांचो एक भक्त देखून तांचे कडेन हे विशीं उलयतलों, अशें तांणी म्हणलां. ‘आतां कळंगूटे तसलें कांय घडना’ अशें आमदार म्हणटात आनी खरेंच तशें आसा, जाल्यार ती एकदम बरी गजाल. थळाव्या लोकांक भिवपाची गरज ना. दुसरे वटेन काँग्रेसीन तो व्हिडियो शॅर करून गोंय ही भोगभूंय जावपाक भाजपा सरकारूच जापसालदार, असो थोमणो मारला.
कळंगूटेकूच कित्याक दोश दिवपाचो? हेर कडेनूय कितें चलता, ताच्यो खबरो अदीं मदीं केन्नाय वाचूंक, पळोवंक मेळटात. मागीर जावं ती मसाजाच्या नांवा खाला चलपी शिंदळकी, राखणेच्या नांवा खाला खंडणी, आवाजाचें प्रदुशण, नशा, मारामारी…. सगलें कितें जाता. पूण ‘गांजो मेळ्ळो, एकल्याक अटक’ फक्त हीच बातमी परत परत येता. कांय म्हयन्यां पयलीं दक्षीण गोंयच्या एका नागरिकान कुटुंबाक घेवन आपूण मांद्रें दर्यावेळेर गेल्लों. सांजवेळ जावंक लागली तशें थंयचें चित्र पळोवन भंय दिसलो, असो पोस्ट सोशल मिडियाचेर घाल्लो. सुज्ञ मनशाक हाचे विशीं आनीक चड सांगपाची गरज ना. स्वामीजीन हें चित्र बदलपाचो उलो पालक, शिक्षकांक मारला. पूण, तांचे परस पुलीस तें बेगीन बदलपाक शकतात. पालक आनी शिक्षकांनी फुडाकार घेवचो, हाचो अर्थ स्वामीजींक थंय चुकीच्या मार्गाचेर चलपी तरणाटे बी दिसूंक नात मूं? कांय तरणाटे वाट चुकल्यात ही गजाल खरी. हातूंत पुराय दोश पालकांचोच आसा, अशें म्हणपाक मेळचें ना. कारण खंयचोच पालक आपलो भुरगो वायट मार्गाचेर वच्चो, अशें चिंती ना. हातूंत त्या भुरग्याचोय दोश आसता. समाजानूय असल्या भुरग्यांक मार्गार हाडपाक जाय. ल्हानपणाचेरूच बरे संस्कार जाल्यार ते एक वेळ बऱ्या मार्गाचेर वचूंक शकतात. पूण प्रत्येक मनशान उजू मार्ग स्वता वेंचून काडूंक जाय. मोह, आशा कुशीक दवरून बरें तें स्विकारपाक जाय. झटपट पयसो मेळटा देखून आयज कोण कितें करता, तें सगल्यांक खबर आसा. दर्यावेळो, दर्यादेगो वाठारांत रावप्यांक आमी हें सांगपाची गरज ना.
प्रुडंट मिडियाक दिल्ले मुलाखतींत स्वामीजीन गोंयची भोगवादी प्रतिमा जाल्या, अशें सांगलें. गोंयांत घुंवळे वखदां सोंपेपणी मेळटात, तांची तस्करीय चलता, अशेंय चित्र आसा. तें बदलपाची गरज आसा, ही गरजूय तांणी उक्तायली. सरकाराक, खास करून पुलीस, अबकारी खातें, अन्न आनी वखदां प्रशासनान हे बाबतींत खर पावलां उबारचीं पडटलीं. थळावे आमदार म्हणटात, ते प्रमाण टावट्स आतां उरूंक नात. डान्स बार बंद जाल्यात, जाल्यार ती बरी गजाल. आतां तांणी पुलिसांचे मजतीन हेर चुकीच्यो, बेकायदेशीर गजाली बंद करपाक वावुरचें. थायलॅण्डांत गेल्ले भशेन दिसता, अश्यो लेनी जर आसात, जाल्यार थंय पुलिसांची गस्त वाडोवची. गोंयच्या दर्यावेळांचेर गैरप्रकार जातात, अशें लोक म्हणटात. सगलेच फट उलोवचे नात. गोंय म्हणल्यार ‘खाओ, पिओ, मजा करो’ हें चित्र जालां, हें न्हयकारून चलचें ना. अर्थांत पर्यटन मळाक ताचो फायदो जाता. पूण कांय धोकादायक गजालींक लागून सभ्य पर्यटक, कुटुंबां दर्यावेळां पसून, पर्यायान गोंया पसून पयस रावपाक शकतात. अशें जावप गोंयचे अर्थवेवस्थेचे नदरेन बऱ्याचें न्हय!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
