गोंयांतली फेरी सेवा लुकसाणांत कित्याक?

भांगरभूंय | प्रतिनिधी

फेरीबोट सेवेंतल्यान येणावळ मेळोवपा खातीर राज्यांत फेरीबोटी चलयतना भौसाचो विचार करचो. फेरीबोटी सेवांचें खाजगीकरण करून सरकार (?) करता कितें?

गोंय फेरीबोटी कायदो, 1990 चो मुखेल हेत म्हळ्यार गोंयांतल्या फेरीबोटीच्या वापराचेर नियंत्रण दवरप, सुरक्षीतताय, भाडें आनी वेवस्थापनाच्या प्रस्नांनी त्रासांत पडपी वेवस्थेची रचना करप आनी अधिकृतपणान निरिक्षण करप. फेरीबोटी वेव्हाराचें प्रमाणीकरण करपाक कायदेशीर चौकटी दिवप, सरकाराक मार्ग आनी टोल नियंत्रीत करपाक मेळचो आनी उदका मार्गांचेर नितळ आनी सुरक्षीत भौशीक येरादारी खातीर नेम लागू करप हो ह्या कायद्याचो हेत आशिल्लो. तर कितें चुकलें? खंयच्या वर्सा सावन फेरीबोटी लुकसाणांत चलपाक लागल्यो? फेरीबोटीच्या वेव्हाराचें लुकसाण जावपाक जायतीं कारणां आसूं येतात. खरें आंग सोदून काडपा खातीर खरेंच परतून तपासणी करपाची गरज आसा. सीएजी अहवालांचो अभ्यास केला केन्ना तरी? तातूंतल्यो बाबी तपासल्याे?
तर, आतां अशें म्हणटात की गोंय सरकार खर्च उणो करपा खातीर, कार्यक्षमताय वाडोवपा खातीर आनी तंत्रगिन्यानाची उदरगत करपा खातीर कांय फेरीबोटी सेवांचें खाजगीकरण करता. ही चाल मुखेलपणान खर्च कापपाचो उपाय आसा, भौशीकपणान चलपी वेवस्था चलोवपाक चड पगार आनी अदीक वेळ (?) खर्चाचो उल्लेख अधिकारी करतात. भौशीक-खाजगी भागिदारी (पीपीपी) मॉडेला कडेन वचपांत रो-रो (रोल-ऑन/रोल-ऑफ) फेरीबोटी सारकिल्ल्या चड आधुनीक बोटींचो आस्पाव जावपाची शक्यताय आसा. बरें! अर्थवेवस्थेक “रॉक अॅण्ड रोल” करचें न्हय. सरकार लोकां खातीर आसा हें लक्षांत दवरात.
आतां खाजगीकरणाचीं मुखेल कारणां पळोवया.
राज्याच्या न्हंय येरादारी खात्यान आपल्या सुमार अर्द्या फेरीमार्गांचें खाजगीकरण करून वर्साक ₹14 कोटी परस चड वाटावपाची अपेक्षा आसा. नवे मॉडेल चड वेळ आशिल्ल्या दोन शिफ्टांच्या खर्चीक भौशीक रोजगार पद्दतींतल्यान सरकारी संबंदीत नाफाविरयत संघटणेन चलयिल्ल्या चड खर्चीक तीन शिफ्टांच्या कार्यावळींत स्थलांतरीत जाता. हांगा धोरण निर्मातो कोण आनी धोरण मोडपी कोण? जाणून घेवपाचो कसलोच मार्ग ना.
अधिकाऱ्यांच्या म्हणण्या प्रमाण नवे वेवस्थे खाला दरेक फेरीबोटीच्या कामगारांच्या पगाराचेर म्हयन्याळो संचालन खर्च खूब उणो जाला. खंयची वेवस्था? कोणाच्या विचारा खाला? ही पद्दत तयार करपी अधिकारी हुशार आसूंक जाय. मागीर अशे हुशार अधिकारी जाग्यार आसतना फेरी सेवा लुकसाणांत कशी चलतली? फेरीबोटी फायद्याची आसपाक जाय आशिल्ली, ना? म्हणल्यार नवी वेवस्था स्वताक विरोधाभासी आसा अशें दिसता?
पोरण्या फेरीबोटींचे सुवातेर रो-रो फेरीबोटी सारकिल्ली चड कार्यक्षम आनी पर्यावरणाक अनुकूल तारवां वापरपाचो राज्याचो हेत आसा, जाका लागून प्रवाशांक तांच्या वाहनां सयत प्रवास करपाक मेळटलो. कांय प्रकरणांनी प्रवाशांचो आंकडो उणो आशिल्ल्यान पोरणी तारवां खाजगी कंपनींक दितले. तर तंत्रीक नदरेन सरकाराक फेरीबोटींची देखरेख कित्याक करपाक मेळना?
ही चाल कार्यकारी आनी वेवसायीक लवचीकता वाडोवपाचो एक मार्ग म्हणून पळयतात, जो भौशीक सेवा खाजगी करपाचो एक सामान्य वाद आसा. हो भौशीक गोंदळ, लोकांक वाजवी भाडें, योग्य समर्थन आशिल्लें, आनी वेळार येरादारी जाय.
फेरीबोट सेवेंतल्यान येणावळ मेळोवपा खातीर राज्यांत फेरीबोटी चलयतना भौसाचो विचार करचो. फेरीबोटी सेवांचें खाजगीकरण करून सरकार (?) करता कितें? भौसाक सोयीचें आसा काय? “उदकाचेर” धांवपाक भौसाक खोशी जावंक दिवची. भौशीक सुविधांचेर “उदक” ओतचें न्हय. दर एका फेरीबोटी मार्गान येणावळ मेळूंक शकना. उपाय सोदून काडपा खातीर सक्षम फेरी अर्थशास्त्रज्ञाची नेमणूक करची.

राजेश बाणावलीकार
वेगसवाडो, हडफडें