भांगरभूंय | प्रतिनिधी
बेळगांव, खबरां संस्था: गोंयांक भाजयेची पुरवण करपी एका कॅन्टरान उबो राविल्ल्या ट्रकाक धपको दिल्ल्यान जाल्ल्या अपघातांत एकल्याक मरण आयलें. जाल्यार एकलो जखमी जालो. मंगळारा रातच्या सुमार धा वरांचेर जांबोटी रोडार किणये लागसार ही घडणूक घडली. मधु कल्लाप्पा अष्टेकर (४०. बिजगर्णी) अशें मरण आयिल्ल्या तरणाट्याचें नांव आसा. हातूंत चालक शुभम चौगुले (बिजगर्णी) हो जखमी जालो.
कॅन्टर नंबर केए २२ सी ९४२३ बेळगांवच्यान गोंयांत भाजयेची येरादारी करपा वेळार जांबोटी रोड किणये लागसार रस्त्यार राविल्ल्या केए २२ सी ६४६१ ह्या ट्रकान पर्कींग केल्लें. हाका लागून भाजयेची येरादारी करपी ट्रक चालकाक ताचो अदमास येवंक नाशिल्ल्यान हो अपघात घडलो. ह्या अपघातांत भाजयेची येरादारी करपी क्लिनराक जाग्यारूच मरण आयलें. पुलिसांनी पंचनामो केलो. मरण आयिल्ल्याची कूड जिल्लो हॉस्पिटलांतल्या मोर्गांत धाडली. हे घडणुकेचो गुन्यांव ग्रामीण पुलीस स्टेशनांत नोंद जाला.
पोस्टमार्टम जाले उपरांत कूड सोयर्यांच्या ताब्यांत दिली. दनपरां ताचे कुडीचेर निमाणे संस्कार जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
