भांगरभूंय | प्रतिनिधी
पणजी: ‘इंडिगो’ एअरलायन्सच्या संचालन संकटाचो फटको गोंयांक दुसर्या दिसाय बसला. शुक्रारा ५ डिसेंबराक गोंयच्या दोनूय आंतरराष्ट्रीय विमानतळांचेर इंडिगोच्या वेवस्थापकीय दोशांचो प्रभाव वेळापत्रकाचेर दिसून आयलो. दाबोळी विमानतळ प्रशासना कडल्यान सकाळीं ११:१५ वरांचेर मेळिल्ले म्हायती प्रमाण, नियोजीत ३८ विमानां मदलीं वट्ट ३१ उड्डाणां रद्द जाल्यांत, जाल्यार मनोहर आंतरराष्ट्रीय विमानतळच्यान (मोपा) ३ उड्डाणां रद्द जाल्यांत.
दाबोळी विमानतळार एकाच दिसा १९ उड्डाणां रद्द जाल्ल्या प्रवाशांक त्रास सोंसचे पडले. फकत ७ विमानां सुरू आसात. रद्द जाल्ल्या विमानां मदीं रायपूर, बंगळूरु (वट्ट ५), इंदूर (२), अहमदाबाद (२), नवी दिल्ली (२), हैदराबाद (३), मुंबय, भोपाळ, जयपूर, सुरत आनी चेन्नय ह्या म्हत्वाच्या मार्गांवेल्या विमानांचो आसपाव आसा.
हाचे भायर, मोपा विमानतळावेल्यान नवी दिल्ली (6E542), बंगळूरु (6E6075), आनी हैदराबाद (6E6124) ह्या ३ विमानांचीं उड्डाणां रद्द जालीं. रद्द जाल्ल्या आनी परत बुकींग केल्ल्या प्रवाशां खातीर इंडिगोच्या समन्वयान सगली वेवस्था केल्ल्याचें आनी प्रवाशां खातीर गरजेची सुविधा उपलब्ध आशिल्ल्याचें विमानतळ प्रशासनान स्पश्ट केलें.
नागरी विमान उड्डाण महासंचालनालयान ह्या संकटाचें कारण सुदारीत ’फ्लायट ड्युटी टायम लिमिटेशन्स’ नेमांचे अंमलबजावणींत चूक आनी नियोजनांत दोश आशिल्ल्याचें स्पश्ट केलें. इंडिगोन क्रू मेंबर्स आनी पायलट हांचो आंकडो उणो आसतनाय व्हडा प्रमाणांत फ्लायटांचें नियोजन केल्लें. नोव्हेंबर सावन नवे नेम लागून जाल्ल्याक इंडिगोच्या ऑपरेशन्साचेर हाचो परिणाम जालो. उण्या स्टाफा कडल्यान चड काम करून घेवपी पोरण्या सवयींक लागून सगले वेवस्थापन हाल्लां, हाचीय कबुली इंडिगोच्या प्रशासनान नागरी विमानोड्डाण महासंचालनालयाक दिल्ल्याचे फाटींच उक्तडार आयिल्लें. प्रवाशांची गैरसोय उणी करपा खातीर आनी सुरक्षा मानके कायम दवरपा खातीर इंडिगोन A३२० विमानांच्या संचालना खातीर १० फेब्रुवारी २०२६ मेरेन विशिश्ठ FDTL तरतुदींत सूट/बदल करपाची मागणी डीजीसीएकडेन केल्या.
सेवा आदले वरीं जावंक कळाव लागतलो
कंपनीन आतां मेरेन दोन फावटीं जाहीर माफी मागली आनी डीजीसीएलाक कळयलें, सेवा स्थिर करपा खातीर ८ डिसेंबर मेरेन आनीक विमानां रद्द करतले आनी उपरांत फुडल्या कांय सप्तकां खातीर सेवांनी कांय प्रमाणांत कपात करतले. इंडिगोन फेब्रुवारी २०२६ मेरेन सामान्य आनी स्थिर सेवा पुरायेन आदलेवरीं करपाचें आस्वासन नियामक संस्थेक दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
