गोंयमुक्तीचो इतिहास विद्यार्थ्यांक कळप गरजेचें

भांगरभूंय | प्रतिनिधी

मोनीली नायक : डॉ. लोहिया हांणी दिली क्रांतीची प्रेरणा

भांगरभूंय । प्रतिनिधी

वाळपय : गोंय मुक्ती खातीर खूब जाणांनी दिल्लें म्हत्वाचें योगदान आयच्या विद्यार्थ्यांक कळपाक जाय. हे खातीर अशे तरेच्या क्रांतीदिसाच्या माध्यमांतल्यान गोंयच्या मुक्तीपूर्व काळाचो इतिहास विद्यार्थ्यां मुखार सादर करप खूह म्हत्वाचें आसा. कारण ज्या स्वातंत्र्य सैनिकांनी आपल्या जिवाची पर्वा करिनासतना गोंयचे मुक्ती खातीर म्हत्वाचें योगदान दिलां, कुटुंबाचो विरह सोंसला. गोंयच्या सर्वांगी उदरगती खातीर सगल्यांत पयलीं सैनिकांनी खूबश्या पांवड्यार म्हत्वाचें योगदान दिलें. लोकनियुक्त सरकार आयले उपरांत गोंयचे उदरगतीक चालना मेळ्ळी. हे खातीर गोंयचे मुक्तीचो इतिहास विद्यार्थ्यांक कळप खूब गरजेचें आसा, अशें भुंयपाल सरकारी माध्यमीक विद्यालयाची मुख्याध्यापिका मोनाली नायक हांणी सांगलें.

भुंयपालच्या सरकारी माध्यमीक विद्यालयांत क्रांतीदीस मनयलो. ह्या वेलार मातयेर मोनाली नायक, संजना शेट्ये, तुळशीदास पर्येंकार हाजीर आशिल्ले. सुरवेक मोनाली नायक हांणी डॉ. राम मनोहर लोहिया हांच्या फोटवांक फुलांचो हार घातलो. यत्ता पांचवी आनी सवेच्या विद्यार्थ्यांनी गोंय क्रांतीदिसाचेर सुंदर गीत सादर केलें. शाळेचे विद्यार्थी श्रतेज पालकरा, प्रतीक शिंगाडे, जिग्नेश पावणे, नैतीक गांवकार हांणी 18 जूनाचेर आदारीत भाशणां केलीं.

मोनाली नायक हांणी भाशणांत गोंयांतल्या स्वातंत्र्य सैनिकांनी आमच्या गोंया खातीर जे हाल, त्रास सोंसले ताचेर उजवाड घातलो. डॉ. राम मनोहर लोहिया हांणी गोंयांत येवन गोंयकारांक संघटीत करपाचें काम केलें. गोंयकारां मदीं एके तरेचें अन्याया आड पेटून उठपाचें सामर्थ निर्माण करून दिलें. गोंयांतल्या लोकां मदीं क्रांतीकारी विचार रुजोवपाचें काम करून गोंयकारां मदीं क्रांतीची प्रेरणा निर्माण केली, अशें तांणी सांगलें.

शिक्षक तुळशीदार पर्येंकार हांणी गोंय क्रांतीदिसाचें म्हत्व स्पश्ट केलें. डॉ. राम मनोहर लोहिया गोंया खातीर प्रेरणास्थान आशिल्ले. तांचे प्रेरणेन गोंयांत क्रांती जाली, अशें तांणी सांगलें. गेविंद तारी हांणी सुत्रसंचालन केलें आनी उपकार मानले. कार्यावळ येसस्वी करचे कातीर सगळ्या शिक्षकांचो आदार मेळ्ळो.