गोंयभर आषाढी एकादस उमेदीन: मुख्यमंत्री सावंत हांणी घेतलें विठ्ठलाचें दर्शन
भांगरभूंय | प्रतिनिधी
दिवचल: आशाढी एकादस पुराय गोंयभर भक्तीभावान मनयली. राज्यांतल्या पांडुरंगाच्या प्रत्येक देवळा कडेन भावीकांच्यो दिंडी पळोवपाक मेळ्ळ्यो. तर कांय कडेन भजनी सप्तकाचें आयोजन केल्लें. उपासाच्या नैवेद्यूय दवरिल्लो. आयज सांखळेच्या श्रीविठ्ठल-रखुमाई देवळांतूय हजारांनी भाविकांची गर्दी पळोवपाक मेळ्ळी. मुख्यमंत्री डॉ. प्रमोद सावंत हांणीय आयज देवळांत पुजा केली. ह्या वेळार सुलक्षणा सावंत हाजीर आशिल्ली.
मुख्यमंत्री डॉ. सावंत हांणी सगल्या गोंयकारांचे जिणेंत सुख, शांती, समृद्धी येवची अशी विठ्ठल-रखुमाईच्या पांयां कडेन मागणें केलें. तशेंच गोंय राज्याचे समृद्धी खातीर प्रार्थना केली. ह्या वेळार तांणी देवस्थान समितीन भाविकांची उत्कृश्ठ वेवस्था आनी बरें आयोजन केल्ले खातीर परबीं भेटयलीं. ह्या वेळार हजर आशिल्ले वारकरी भक्तां कडेन तांणी संवाद केलो. तशेंच समेस्त गोंयकारांक एकादशीची परबीं भेटयलीं.
मजगतीं, सुंदर पेठ युवक मंडळ आनी रोटरेक्ट क्लब दिवचले वतीन आषाढी एकादशी निमतान देडशें वारकर्यांची पायी वारी काडली. दिवचलेचे आमदार डॉ. चंद्रकांत शेट्ये हांणी वारींत वाटो घेतलो. तांचे वांगडा समरेश काणेकार, प्रशांत शिरोडकार, नारायण बेतकीकार हांचे सयत जायत्या जाणांनी वांटो घेतलो. दिवचल, सत्तरी तालुक्यांतल्यान विठ्ठलापुराच्या पांडुरंगाच्या देवळांत दिंडी आयिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
