गोंयच्यो सात भाजयो जाल्यो स्वयंपूर्ण

भांगरभूंय | प्रतिनिधी

पणजीः पयलीं गोंयांत भाजी बेळगांव सावन येताली. पूण आतां गोंयच्यो सात भाजयो स्वयंपूर्ण जाल्ल्यान त्यो आतां बेळगांवां वतात. ह्यो सात भाजयो गोंयचे शेतकार तयार करून गोंयांतच खपयतात आनी जी भाजी उरता ताची बेळगांवां निर्यात करतात. गोंय फलोत्पादन उदरगत म्हामंडळाच्या खात्रीशीर बाजार येवजणेक लागून हें शक्य जालां अशीं म्हायती गोंय फलोत्पादन उदरगत म्हामंडळाचे सरवेवस्थापक चंद्रहास देसाय हांणी दिली.

गोंयच्या शेतकारां खातीर फलोत्पादन म्हामंडळ खात्रीशीर बाजार येवजण चालीक लायता. हे येवजणे खाला भाजी विकपा खातीर खात्रीशीर बाजार सुविधा आनी खात्रीशीर दर म्हामंडळ दिता अशें देसाय हांणी सांगलें.

राज्यांत तवशी, भेंडे, चिटकी, कोंकण दुदी, वायंगी, हरवी मिरसांग आनी कोबी हे भाजयेची पिकावळ काडपाक गोंय स्वयपूर्ण जाल्लयान बेळगांव सावन भाजयेची आयात 25 ते 30 टक्के उणीं जावन आतां म्हामंडळाक हे भाजये खातीर बेळगांवचेर निंबून रावचें पडना. गोंयचे शेतकारच हे भाजयेची पिकावळ काडटात अशें देसाय हांणी सांगलें.

म्हामंडळ ह्यो भाजयो गोंयच्या शेतकारां कडल्यान विकत्यो घेवन म्हामंडळाच्या केंद्रांनी पुरवण करता. जी भाजी उरता ती गोवा बागयतदार आनी खाजगी पसरकारांक धाडटा. तरी ही भाजी उरली जाल्यार ती बेळगांवां निर्यात करतात अशे देसाय हांणी म्हणलें.

हे येवजणे खाला फाटल्या स वर्सांची तुळा करीत जाल्यार अंदूं लाव मेळपी शेतकरांच्या आंकड्यात 167 मेरेन वाड जाल्या. ह्या शेतकारांचे पिकावळींत अंदूं 658 मेट्रीक टन इतली वाड जाल्या. पिकावळी खातीर मेळपी लावांत 2.52 कोटी मेरेन वाड जाल्या आनी फलोत्पादन केंद्राच्या 2 पसऱ्यांनी वाड जाल्या. फाटल्या स वर्सांत हे आंकडे सेगीत वाडत आसात अशी म्हायती देसाय हांणी दिली.

फाटल्या दोन वर्सांच्या आंकड्यांचो नियाळ घेतल्यार वर्स 2023-24 सात 1187 शेतकारांक लाव मेळटालो आनी 2024-25 वर्सा 1248 शेतकार लाव घेतात. वर्स 2023-24 सात 1509 मेट्रीक टन गांवठी भाजी म्हामंडळान घेतिल्ली आनी 2024-25 वर्सां हातूंत वाड जावन 1624 मेट्रीक टन भाजी म्हामंडळान घेतिल्ली. वर्स 2023-24 सात 5.94 कोटी इतले रुपया शेतकारांक मेळ्ळे आनी 2024-25 सात वाड जावन 6.67 कोटी इतले रुपया शेतकारांक मेळ्ळ्यात अशीय म्हायती देसाय हांणी दिली.

भायल्या राज्यांतल्यान शेतकारांची पिकावळी विकती घेवपी वेपारी आनी तांचो दर थारिल्लो नासता. पूण शेतकारांक हुस्क्यांत घालपी गोंयांत ही परिस्थिती ना. खात्रीशीर बाजार येवजणे खाला तांकां भाजी विकपा खातीर सुवात सोदपाची गरज ना. तांणी म्हामंडळाचे खरेदी केंद्राचेर येवन तांचे कडेन आसा तितली भाजी केंद्राचेर घालची. कितली भाजी घालप हाचेर कसलीच मर्यादा ना.

जाल्यार खात्रीशीर बाजार भाव येवजणे खाला वेगळ्या वेगळ्या भाजयां खातीर एक दर निश्चीत केला. जर बाजारभावांत भाजयेचो दर थारयिल्ल्या दरा परस उणो जाता जाल्यार आमी हो दर कसोच उणो करिनात, आमी तांकां वाडीव दरूच दिता. जर बाजारभावांत थारायिल्ल्या दरा परस दर वाडलो जाल्यार आमी दर वाडयतात. देखीक भेंड्या खातीर 50 रुपया दर थारयला जर बाजारांत भेंड्याचो दर 20 रुपया जाता आमी 50 रुपयाच दितले. जर दर 80 रुपया जाता जाल्यार दर 80 रुपया मेरेन वाडयतले अशे देसाय हांणी सांगलें.