भांगरभूंय | प्रतिनिधी
भांगरभूंय । प्रतिनिधी
फोंडेंः लोकसभा वेंचणुके खातीर उत्तर गोंयांतली आपली उमेदवारी निश्चीत जाल्या. राज्य सरकार, पक्षाचे वावुरपी आनी आपलें बरें मागतल्यांचें तातूंत चड योगदान आसा. विरोधक अभ्यास करनास्तना टीका करतात तरी गोयांतल्या दोनूय लोकसभा मतदारांत भाजप उमेदवारांचें जैन निश्चीत आसा अशें उत्तर गोंयांतले भाजपाचे उमेदवार, केंद्रीय मंत्री श्रीपाद नायक हांणी वस्तवाडो- आडपय हांगा आयोजीत केल्ले कार्यावळींत सांगलें.
बांधकाम, उदका स्रोत आनी वीज खात्या वतीन उदरगतीच्या कामाक सुरवात करतना ताणी हें सांगलें. ह्या वेळार उदका स्रोत मंत्री सुभाष शिरोडकार, वीज मंत्री सुदिन ढवळीकार, जिल्हो पंचायत वांगडी गणपत नायक, सरपंच चंदन नायक, पंच वांगडी क्षिप्रा नायक हाजीर आशिल्ली. खासदारीच्या आपले आतां मेरेनचे कारकिर्दींत 1250 परस चड प्रकल्प उत्तर गोंयांत पुराय करून लोकांक ओपल्यात. उत्तर गोंय मतदारसंघ देशांतल्या मतदारसंघ उदरगतीच्या बाबतींत धावे सुवातेर आसा अशें सर्वेक्षणांत दिसून आयलां. विरोधक सत जाणून घेनास्तना बेठीच टीका करतात. तांचे हे टिकेचो लोकसभा वेंचणुकेचेर कसलोच परिणाम जावचो ना अशे नायक हांणी सांगलें.
सुभाष शिरोडकार हांणी भाजपा सरकार लोकांच्यो अपेक्षा पुराय करता अशें सागलें जाल्यार सुदिन ढवळीकार हांणी मडकय मतदारसंघांत उदरगतीचीं कामा नेटान सुरू आसात आनी लोकांक तांचो रोखडोच फायदो मेळटलो अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
