भांगरभूंय | प्रतिनिधी
पणजीः राज्यांतल्या 191 पंचायती मदल्यो 89 पंचायतींचे कारभार सगले ऑनलायन चलतात. ते भायर गोंयचे दोनूय जिल्हाे पंचायती ह्यो लेगीत ऑनलायन जाल्यात. तशेंच पंचायत भवन बांदपा खातीर केंद्रा कडल्यान 40 लाख रुपयांचो निधी राज्याक आयला अशी म्हायती केंद्रीय पंचायत राज मंत्रालयान दिल्या.
लोकसभेंत लेखी जाप दितना केंद्रीय पंचायत राजराज्य मंत्री एस पी सिंह बघेल हांणी सांगले की,
ग्रामपंचायत भवनाचे बांदकाम आनी ह्या भवनाचे आनी संगणकाचे मजतीन सामान्य सेवा केंद्रां एकठांय हाडपा सारकिल्ल्यो मुळाव्यो सुविधा उपलब्ध करून ग्रामपंचायतींचे काम सुरळीत चलपा खातीर राज्य सरकाराच्या यत्नांक फाटबळ दिवपा खातीर राष्ट्रीय ग्राम स्वराज अभियान ह्या वर्स 2022-23 ते 2025-26 मेरेन चालीक लायलां. राज्य सरकार वर्सुकी कृती आराखडो धाडटा आनी केंद्राच्यो दोन सशक्त समिती हांकां मंजुरी दिता.
हे येवजणे खाला पंचायत भवन बांदपा खातीर केंद्रातल्यान 40 लाख रुपयांचो नीधी आयला. वर्स 2022-23 वर्सा 20 लाख आनी 2023-24 वर्सा आनीक 20 लाख आयिल्ले. पूण वर्स 2024-25 खातीर अजूून मेरेन निधी आयिल्लो ना.
पंचायत हो राज्याचो विशय जावन आशिल्ल्या कारणान पंचायतीक मुळाव्यो सुविधा दिवप ही राज्याची जापसालदारकी आसा. केंद्रीय वित्त आयोग, राज्य वित्त आयोग, पंचायतीचो निधी आनी हेर स्त्रोतांतल्यान आयिल्लो निधी एकठांय करून मुळाव्यो सुविधा तयार करपा खातीर पंचायतीचे कामकाज सुरळीत करप हे राज्य सरकारा कडल्यान अपेक्षीत आसा.
ई-पंचायत मिशीन मोड प्रकल्प खाला पंचायतीराज मंत्रालयान ई-ग्राम स्वराज ही संकल्पना चालीक लायल्या. ऑनलायन पेमेंट सयत नियोजन, अर्थसंकल्प तयार करप, खात्याचो हिशोब दवरप, देखरेख दवरप, मालमत्ता वेवस्थापन एकाच डिजिटल माचयेरे जाता. हे सुविधे खातीर राज्यांतल्यो पुराय 191 पंचायतींचो आस्पाव जाल्लो. तातूंत 89 पंचायती ऑनलायन सुविधा सयत सुसज्ज जाल्यात. तशेंच हे येवजणे खाला गोंयच्यो उत्तर आनी दक्षीण गोंय जिल्हो पंचायतींचो आस्पाव केल्लो. ह्यो दोनूय जिल्हो पंचायतींचो कारभार आतां ऑनलायन जाल्यात.
पंचायत खात्यांचे ऑनलायन ऑडीट करपा खातीर ऑडीट ऑनलायनाचो वापर जाता. जाल्यार मेकी पंचायत ह्या अॅपा वरवीं नियोजन, उपक्रमाची आनी कामाच्या उदरगतीची म्हायती सामान्य लोकां मेरेन पावता. जाल्यार पंचायत निर्णय ह्या अॅपा वरवीं ग्रामसभा कार्यवाहीत पारर्दशकताय आनी वेवस्थापनांक मजत मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
