भांगरभूंय | प्रतिनिधी
गोविंद गावडेः मडगांवां सरस 2023 प्रदर्शनाचें उक्तावण
भांगरभूंय । प्रतिनिधी
मडगांव: गोंयच्या हस्तकारागिरांनी तयार केल्या उत्पादनाक गोंयांत बाजारपेठ उपलब्ध करून दिवपा खातीर दर एका मार्केटांत एक दुकान दिवपाचो यत्न करतलों. हाची सुरवात आपल्या मतदारसंघांतल्यान बाणास्तरी मार्केटांतल्यान करतलों, अशें आस्वासन ग्रामीण विकास मंत्री गोविंद गावडे हांणी मडगांवां सरस 2023 प्रदर्शनाच्या उक्तावण सुवाळ्यांत उलयताना दिलें.
ह्या वेळार वास्कोचे आमदार कृष्णा (दाजी) साळकार, नावेलीचे आमदार उल्हास तुयेंकार, मडगांवचे नगराध्यक्ष दामोदर शिरोडकार, दक्षीण गोंय प्रकल्प संचालक प्रवीण बरड, ग्रामीण विकास सचीव मिनीन डिसोझा, नितीन नेवरेकार आनी सुयश खांडेपारकार हाजीर आसले.
मंत्री गावडे हांणी सांगलें, मडगांव सरस महोत्सवांत चडांत चड लोकांनी भेट दिवन हस्त कारागिरांनी तयार केल्यो वस्तू खरेदी करून तांकां र्बा दिवची. सरस फक्त गोंयांतूच न्हय जाल्यार पुराय भारतांत सगळ्या राज्यांनी आयोजीत करतात. दर एका कदंब बस स्टॅण्डाचेर हस्त कारागिरां खातीर एक दुकान दिवपाचो यत्न करतलों, अशें तांणी सांगलें.
दाजी साळकार आनी उल्हास तुयेंकार हांणी सरस 2023 चें आयोजन बरे तरेन केल्यान मंत्री गावडे हांच्या वावराची तोखणाय केली. दामोदर शिरोडकर हांणी ह्या वेळार मडगांव पालिके वतीन पुराय आदार दिवपाचें उतर दिलें.
ग्रामीण विकास मंत्रालयाच्या वतीन राष्ट्रीय ग्रामीण उपजीविका अभियान हे कार्यावळी खाला ग्रामीण कारागीरांक तांच्या उत्पादनांचें प्रदर्शन आनी विक्री करपा खातीर सरस महोत्सवाच्या माध्यमांतल्यान उपलब्ध करून दिवपा खातीर उर्बा आनी समर्थन ह्या सरस महोत्सवांतल्यान दितात. ह्या वर्सा हो सरस महोत्सव मडगांव एसजीपीडीए मैदानार 23 मार्च ते 3 एप्रील मेरेन चलतलो. ह्या सरस महोत्सवांत गोंया सयत आंध्रप्रदेश, आसाम, अरुणाचल प्रदेश, बिहार, छत्तीसगढ, गुजरात, हिमाचल प्रदेश, हरियाणा, जम्मू आनी काश्मीर, झारखंड, कर्नाटक, केरळ, मध्यप्रदेश, महाराष्ट्र, मणिपूर, मेघालय, मिझोरम, नागालँड, ओडिशा, पाँडेचरी, पंजाब, राजस्थान, सिक्कीम, तामिळनाडू, तेलंगणा, त्रिपुरा, उत्तर प्रदेश, उत्तराखंड, पश्चीम बंगाल, राज्यांतले कारागीर आपल्या वस्तूंचें प्रदर्शन आनी विक्री करतले. ह्या सरस महोत्सवांत सुमार 220 दुकानां उबारल्यात. गोंया सयत हेर राज्यांच्यो कला आनी हस्तकला, मातयेच्यो वस्तू, सलवार, चुडीदार, साडयो, टेराकोटा, वस्तू, ज्यूट वर्क्स, बांबू काम, भरतकाम, वस्तूंचें प्रदर्शन आनी विक्रे खातीर आसात. सुमार 400 कारागीर हातूंत वांटेकार जाल्यात. दक्षीण गोंय प्रकल्प संचालक प्रवीण बरड हांणी येवकार दिलो जाल्यार रुपा च्यारी हांणी सुत्रसंचालन केलें आनी उपकार मानले.
सांस्कृतीक कार्यावळींचें आयोजन
सरस महोत्सवा निमतान 23 मार्च ते 3 एप्रील मेरेन सांस्कृतीक कार्यावळींचें आयोजन केलां. विंगड विंगड पंगड गायन, नाच, आनी भोवढंगी भेस सर्ती घेतले. ह्यो कार्यावळी सांजेच्या 7 ते रातच्या 9.45 वरां मेरेन चलतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
