भांगरभूंय | प्रतिनिधी
सात वाठारांनी स्टार्टअप कार्यरत; सगल्यांत चड आयटी मळार
पणजीः गोंयांत बायलां स्टार्टअप सुरू करपा विशीं मुखार आसात. गोंयांत सुरू जाल्ले वट्ट स्टार्टअपा मदले 47% टक्के स्टार्टअप बायलांनी सुरू केल्यात. मजगतीं, गाेंयच्या सात वाठारांनी स्टार्टअप कार्यरत आसात आनी सगल्यांत चड आयटी मळार स्टार्टअप सेवा दितात अशें म्हायती आनी तंत्रज्ञान खात्याचे आयटी प्रोत्साहन विभागान म्हणलां.
खात्यान दिल्ले म्हायती प्रमाण गोंयांत डीपीआयटी मान्यताय आशिल्ले 635 स्टार्टअप आसात. तातूंतले 299 स्टार्टअप बायलांनी सुरू केल्यात. गोंयच्या स्टार्टअप मळार बायलांचो 47 टक्के इतलो वांटो आसा.
मजगतीं, गोंयच्या सात वाठारांनी स्टार्टअप कार्यरत आसात. सगल्यांत चड 23.49 टक्के स्टार्टअप आयटी मळार, अन्न आनी पेय मळार 18.73 टक्के, पर्यटन मळार 13.97 टक्के, भलयाकी आनी जिवन विज्ञान मळार 13.33 टक्के, वेवसायीक सेवा मळार 12.38 टक्के, बांदकाम मळार 9.52 टक्के आनी शिक्षण मळार 8.57 टक्के स्टार्टअप आपली सेवा दितात.
कल्पना ते प्रत्यक्ष स्टार्टअपची सुरवात करपा खातीर गोंयांत 6 इन्क्युबेटर्स, 18 अटल टिंकरिंग लॅब्स, 15 को-वर्किंग सुवातो, 15 स्टार्टअप कॅफे, आनी दरेकी एक व्हेन्चर स्टुडियो आनी मॅकर स्पेस कार्यरत आसात.
ह्या 635 स्टार्टअपांनी सुरवेक आपली कल्पना प्रत्यक्षांत सुरू करपा खातीर खाजगी मळार रु. 1,300 कोटी इतलो निवेश मेळ्ळा. जाल्यार सरकारा कडल्यान तांकां सुरवेक वेवसाय करपा खातीर दर स्टार्टअपांक रु. 10 लाख अनुदान म्हूण 15 कोटी रुपया मेरेन अनुदान दिलां. जर हो स्टार्टअप फुाडारांत येसस्वी थारलो जाल्यार गोंय सरकार अदीक अनुदान दितलें.
म्हायती आनी तंत्रज्ञान खात्यान आतां सावनच विद्यार्थ्यांक स्टार्टअप मळार तयार करपाक सुरवात केल्या. खात्याचे गोवा ओपन इनोव्हेशन मार्केट एक्सेस एक्स्पो 2025 स्टार्टअप आनी विद्यार्थ्यां मदीं सर्त घडोवन हाडली. इन्क्युबेटर्स खाला शिकपी 81 विद्यार्थ्यांनी 467 स्टार्टअपा वांगडा आपलो प्रयोग दाखोवपाची संद मेळ्ळी. गोंयांत 172 विद्यार्थी इन्क्युबेटर्स खाला सात मळार स्टार्टअपाचे धडे घेतात. तातूंतल्या पर्यटन मळार 26, कोयर वेवस्थापनांत 11, म्हायती तंत्रज्ञान आनी संचार मळार 13, शेतकी मळार 5, उद्देग मळार 4 आनी भागिधारी मळार 3 आनी हेर मळार 110 विद्यार्थी धडे घेतात.
डिजिटल महिला सशक्तीकरण वा ड्रोन दिदि येवणजणे वरवीं बायलांक सशक्तीकरण करपाचे आसत जाल्यार भौशीक सेवा वाडोवपा खातीर गोवा ऑनलाय वॅबसाटीचेर एआय चॅटबोट सुरू करपाचे आसत, नाविन्य हें सगल्यांक आस्पावन घेवपी आनी सुलभ आसचें हाचेर आमचे लक्ष आसा. ड्रोन दिदि येवजण ही विशेश येवजण शेतकी मळार आनी ताचे पलतडी ग्रामीण वाठारांतल्या बायलांचे कुशळटाय उदरगतीचेर लक्ष केंद्रीत करता अशें म्हायती आनी तंत्रज्ञान मंत्री रोहन खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
