‘गोंयच्या सायबा’च्यो दाखोवण्यो

भांगरभूंय | प्रतिनिधी

क्रि स्तांव जांव हिंदू गोंयांत रावपी प्रत्येक गोंयकारांक सां फ्रान्सीस झेवियर म्हणल्यार गोंयच्या सायबाचेर मना पसून भावार्थ आसा. गोंयकार गोंयांत आसूं वा संवसारांतल्या खंयच्याय कोनशार तो मागीर हिंदू आसूं वा क्रिस्तांव डिसेंबराचे 3 तारखेर ‘सायबाचें फेस्त’ म्हण कोणूच विसरना. बाँ जिजस बासिलिका वटेन वचपी दरेक वाहन ह्या इगर्जे सामकारा थावन वतना देवाक आपलें परी नमन करीत फुडल्या प्रवासाक वता.
फाटलीं कितलींशींच वर्सा गोंयच्या सायबाची पवित्र कूड बासिलिकेंत आसा. दर धा वर्सांनी तिचे दाखोवणेचो सभारंभ दबाज्यान जाता. हे कुडिचें दर्शन वा उमाव घेवपाक संवसारांतल्या कोनशार सावन भावीक येतात आनी आपलो भावार्थ प्रकट करतात. गोंयच्या सायबाक केल्ली आंगवण पावताच असो भावार्थ लोकां मदीं आसा. जात- पात, धर्म, प्रांत, रंग विसरून लोक दर्शनाक येतात.
कूड दाखोवणेचो सुवाळो 21 नोव्हेंबराक सुरू जालो. तो आयतार 5 जानेवार 2025 दिसा सोंपतलो. 21 वेर दबाज्यान धर्मीक विधीन सकाळीं सायबाची कूड पुरसांव काडून से केथेड्रल इगर्जेंत दवरली. 5 जानेराक परत पुरसांव काडून ती बाँ जिजस बासिलिकेंत हाडतले आनी सुवाळो सोंपतलो.
कुडीचे दाखोवणेचो इतिहास
सां फ्रांसिस शावियेराचे पवित्र कुडीच्यो खासगी दाखोवण्यो जायत्यो जाल्यात, असो संदर्भ आसा. पूण भौशिक दाखोवण्यो आजमेरेन फकत 17 जाल्यात. अंदूंची ही 18 वी दाखोवण. भौशीक दाखोवण्याचो एक नियाळ.
10- 12 फेब्रुवारी 1782
सायबाच्या पवित्र कुडिच्यो खासगी दाखोवण्यो जायत्यो जाल्यो, पूण भोवशीक दाखोवणी 1782 च्या फेब्रुवारी म्हयन्यांत 10 -12 तारखे मेरेन जाली. ही पयली. उपरांत दोखोवणेची सुरवात जाली.
दुसरी 3 डिसेंबर 1859
दुसरी दाखोवण 78 वर्सां उपरांत 1859 वर्सा जाली. ती करूंक पुर्तुगालाच्या राजाची मान्यताय हाडची पडली. 3 डिसेंबर 1859 ते 8 जानेवारी 1860 मेरेन 37 दिसांची ही दाखोवण आसली. ह्या 37 दिसांनी सुमार दोन लाख यात्रेकारांनी सांताचे पवित्र कुडीचो उमाव घेतलो. हे दाखोवणेक पयलेच खेप गोंया भायले तशेंच शिलांवाचे (श्रीलंकेचे) लोक दर्शनाक गोयांत पावले.
तिसरी दाखोवण 3 डिसेंबर 1879 दिसा सुरू जाली. ह्या काळांतलो गोंयचो आर्चबिस्प दो. आयरीश द ओनेंलांस द वाश्कोन्सेलुश, ही दाखोवण करपाक फुडें सरलो. ती से केथेड्रल इगर्जेंत जाली. ही इगर्ज व्हडली आनी चड लोक थंय जमू येताले. ती 35 दीस चल्ली. तीन लाखां वयर यात्रेकारां येवन गेले. हे दाखोवणेक हैदराबादचो निजाम (राजा) आगबोटींतल्या गोंयां आयिल्लो.
चवथी 3 डिसेंबर1890 दिसा सुूरु जाली. ही दाखोवण 29 दिसांची. ह्या वेळार भारतांतले तशेंच भारता भायले जायते बिस्प हाजीर जाले. तेन्ना सुमार 1,71,000 लोकांनी दर्शन घेतलें.
पांचवी 7 डिसेंबर 1900
1900 वर्स शेकड्याचें निमणें वर्स. डिसेंबराचे 4 ते 6 तारखे मेरेन बऱ्या जेजुचे इगर्जेंत एक धर्मीक सभा जांवपाची आसली. हे सभेक भारतांतले 16 बिस्प हाजीर जावपाचे आसले. ताका लागून ही तीन दिसांची दाखोवण 7 ते 10 डिसेंबर 1900 मेरेन केल्ली.
सवी 26 नोवेंबर 1910
आफोंस द आल्बुकेर्क ह्या पुर्तुगाली फुडाऱ्यान 1510 वर्सा नोव्हेंबराचे 25 तारखेर गोंय शार मुस्लिमांच्या हातांतलें दुसरे पावटी जिखून घेतलें. 1910 वर्सा ह्या जैताक चार शेंकडे पुराय जाताले ताकाच लागून त्या शेंकड्याच्या उगडासाक ही दाखोवण जाली. ती 26 ते 28 नोव्हेंबर 1910 मेरेन जाली.
सातवी 3 डिसेंबर 1922 ते 7 जानेवारी 1923
सातवी दाखोवण 35 दिसांनी सोंपलीं, पूण 7 जानेवारी उपरांत पवित्र कूड रुप्या पेटयेंत रोखडीच धांपली ना. 12 आॅगस्ट 1923 जावन मीस भेटोवन पवित्र कूड धांपली.
आठवी 3 डिसेंबर 1931 ते 10 जानेर 1932
1929 वर्सा जुवांव कार्लुश क्रावेयर लोपीश हो गोंयचो गोवर्नादोर जावन गोंयां पावलो. तो गोंयच्या सायबाचो व्हड भक्त. पवित्र कुडीची दाखोवण करून तो आपली राजवटकी सुरू करूंक सोदी. पूण ते वेळावेल्या नव्यानूच नेमणूक जाल्ल्या आर्चबिस्पान तशें जांवक दिलें ना. 1930 वर्सा गोंयांक नव्या पात्रियार्कान मात पवित्र कुडीची दाखोवण करपाक आपली संमत्ती दाखयली. ही दाखोवण सुमार 37 दिसांची जाली.
णववी दाखोवण 6 ते 17 मे 1942
हे दाखोवणे वेळार दुसरें विश्व झुज चालू आसलें, ताका लागून चड व्हडले दबाजे जांवक ना. 6 मे 1542 वर्सा सां फ्रांसीस शावियेर गोंयां पाविल्ले आनी हे गजालीक चार शेंकडे पुराय जाताले. पियुस- 12 पापसायब जाल्यार 25 वर्सां भरतालीं. तशेंच फातिमा सायबीण दिश्टी पडल्यारूय 25 वर्सां जातालीं. ह्या तिनूय कारणांक लागून ही दाखोवण जाली. हे दाखोवणेंत दिसाक 13,000 लोक सायबाचो उमो घेताले.
धावी 3 डिसेंबर 1952 ते 6 जानेर 1953.
हे धावे दाखोवणेक युरोप थावन भावार्थी आयिल्ले. पुर्तुगालचे, इस्पानियाचे, इतालियाचे, इंग्लंडाचे, अमेरिकेचे,आफ्रिकेचे पत्रकार, पाकिस्तान आनी भारतांतले पत्रकार गोंयां पाविल्ले. पयलेच फावटीं हे दाखोवणेची खबर रेडिओवेल्यान अख्ख्या संवसारांत पावली.
इकरावी 14 ते 31 डिसेंबर 1961
ह्या दिसांनी गोंय मुक्तीचें आंदोलन चलतालें. हाचो प्रभाव दाखोवणेचर पडलो. गोयां भायले यात्रेकार येवंक नांत. पणजेचे आनी तिसवाडी म्हांलांतले लोक व्हडा संख्येन हे दाखोवणेक पावले. 31 तारखेर पवित्र कूड धांपली. गोंयांत पुर्तुगालाची साडेचारशीं वर्सांची राजवट सोंपून राज्य भारताचें जाल्लें.
बारावी 24 नोवेंबर 1964 ते 6 जानेर 1965
नोव्हेंबराचे 28 ते डिसेंबर 6, 1964 मेरेन मुंबय क्रिस्तांव धर्माची व्हड जमात जावपाची आसली. ह्या निमतान संवसारांतले लोक मुंबय येवपाचे आसले. तांकां दाखोवपाक लागून गोंयच्या सायबाचे पवित्र कुडीची दाखोवण करपाचें थारायलें. आफ्रिकेंतल्यान यात्रेकार येवपाचे आसले. ताका लागून 17 जानेर मेरेन हे दाखोवणेचे दीस वाडयल्ले.
तेरावी 23 डिसेंबर 1974 ते 5 जानेर 1975
हे दाखोवणेंत पयलेच फावट गोंयच्या सरकारान भार घेतलो. ही दाखोवण मुंबय दूरदर्शनाचेर त्या वेळार प्रक्षेपीत केल्ली. हाका लागून डिसेंबराचे 20 तारखेर मुंबय दुरदर्शनाचे पत्रकार गोंयात येवन राविल्ले. डिसेंबराच्या 24 तारखेर भारत सरकारान बाँ जिजस बासिलिकाच्या आदरान एका टपाल तिकेटीचें प्रकाशन केल्लें.
चवदावी – 21 नोव्हेंबर 1984
ही दाखोवण 52 दीस आसली. 1,29,076 लोकांनी कुडीचो उमाव घेतलो. पंदरावी दाखोवण- 21 नोव्हेंबर 1994 ते 7 जानेर 1995 मेरेन 47 जालू आसली आनी हे दाखोवणेंत 10,78,174 लोकांनी पवित्र कुडीचो उमाव घेतलो.
सोळावी दाखोवण 21 नोवेंबर 2004 ते 2 जानेर 2005 मेरेन 43 चालू आसली. सुमार 34 लाख लोकांनी दाखोवणे वेळार दर्शन घेतलें.
सतरावी – 22 नोवेंबर 2014 ते 4 जानेर 2015
ही दाखोवण 44 दीस चालू आसली. सुमार 60 लाख लोकांनी दर्शन घेतलें.
सां फ्रान्सीस शावियर 1506 वर्सा 7 एप्रीलाक स्पेनांतल्या नावार्रा प्रांतांत शावियर कोटांत जल्मलो. 1552 वर्सा डिसेंबराचे 2 आनी 3 तारखेच्या मदीं फांतोडेर दोन वरांचेर जपानाच्या सांचियान जुव्यांचेर ताका मरण आयलें.
(‘सां फ्रान्सीस शाविएर- इतिहासीक नदरेन’- सर्गेस्त फा. मोरेन द सोज जे. स. हांच्या रोमी लिपयेंतल्या पुस्तकाचो सर्गेस्त फा. माथेव आल्मेद जे. स. आनी प्रीता नायक हांणी देवनागरी लिपयेंत लिप्यांतर केल्ल्या पुस्तकांतलो संदर्भ घेतला.)

प्रिता परब
9921382375