भांगरभूंय | प्रतिनिधी
निधी तशेंच प्लेसमेंटा खातीर जातलो लाव
पणजी: पोरणें गोंय हांगच्या शेतकी म्हाविद्यालयाच्या शेतकी पदवी अभ्यासक्रमाक (बी. एससी. अॅग्रीकल्चर) भारतीय कृशी संशोधन संस्था, नवी दिल्लीची (आयसीएआर) अधिमान्यताय फावो जाल्या. अधिमान्यताय मेळपा खातीर मुख्यमंत्री डॉ. प्रमोद सावंत हांणी म्हाविद्यालयाचे अभिनंदन केलें.
गोंय तशेच शेतकी म्हाविद्यालया खातीर हो अभिमानाचो खीण आसा. राज्याच्या शेतकी वाठाराच्या उदरगती खातीर म्हाविद्यालयाचो हातभार लागपाची गरज आसा, अशें मुख्यमंत्री डॉ. प्रमोद सावंत हांणी म्हणलें.
पोरणे गोंय हांगा बी.एससी. (शेतकी) ह्या अभ्यासक्रमांत दर वर्सा 60 विद्यार्थ्यांक प्रवेश मेळटा. आयसीएआर प्रयोग शाळा, मुळाव्यो सुविधा तशेंच प्राध्यापकांच्या पात्रतायेची पळोवणी करून अधिमान्यताय दिता. ही अधिमान्यताय मेळ्ळे उपरांत अभ्यासक्रम तशेंच म्हाविद्यालयाक एक प्रतिश्ठा मेळटा, अशें म्हाविद्यालयाचे प्राचार्य डॉ. सुरेश कुंकळ्येंकार हांणी सांगलें. म्हाविद्यालयाक आतां आयसीएआर संस्थे कडल्यान निधी मेळटलो. विद्यार्थ्यांच्या प्लेसमेंटा खातीर लेगीत अधिमान्यतायेचो लाव जातलो, अशें प्रा. कुंकळ्येंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
