भांगरभूंय | प्रतिनिधी
पणजीः फाटल्या तीन वर्सांत गोंयच्या शेतकारांनी 5 हजार कोटी परस चड रीण काडलां. तातूंत वेवसायीक बँकांनी एक हजार कोटी परस चड रीण काडलां जाल्यार सहकारी बँक संस्थेंत 100 कोटी वयर रीण काडलां. मात, प्रादेशीक ग्रामीण बँकांतल्यान एकाय रुपयाचें रीण काडूंक ना, अशी म्हायती शेतकी आनी ग्रामीण उदरगती खातीरची राष्ट्रीय बँक (नाबार्ड) हांणी दिल्या.
नाबार्डान तयार केल्ल्या अहवाला प्रमाण 2021 ते 2024 ह्या काळांत गोंयच्या शेतकारांनी वट्ट 5806 कोटी इतलें रीण घेतलां. तातूंतले वेवसायीक बँकांनी 5584 कोटी जाल्यार सहकारी बँकांतल्यान 222 कोटी मेरेन शेतकारांक रीण मेळ्ळां. ग्रामीण बँकांतल्यान एकल्यानूय रीण काडूंक ना.
2021- 22 त वेवसायीक बँकांतल्यान 1,436 कोटी जाल्यार सहकारी बँकांतल्यान 38 कोटी रीण शेतकारांनी घेतलां. 2022- 23 त शेतकारांनी वेवसायीक बँकांतल्यान 1,751 कोटी जाल्यार सहकारी बँकांतल्यान 153 कोटी इतलें रीण काडलां. 2023- 24 त वेवसायीक बँकांतल्यान शेतकारांनी 2,397 कोटी जाल्यार सहकारी बँकांतल्यान 31 कोटी मेरेन रीण काडलां. शेतकारांक बियाणीं, सारें आनी वखदां तशेंच हेर पिकावळीच्या खर्चा खातीर उण्या काळा खातीर 7 टक्के जुरा सयत 3 लाख मेरेनचें रीण मेळटा. जाल्यार भारत सरकाराच्या उपक्रमा खाला सुदारीत जूर अनुदान येवजणे खाला तत्काळ परतफेड म्हूण 3 टक्के रक्कम वेळावेळार रीण भरपा खातीर मेळटा. देखून शेतकारांक रीण प्रत्यक्षांत 4 टक्क्यांचेर मेळटा. जीं रिणां 3 लाखां वयर आसात तांकां कसलेच अनुदान मेळना आनी तांचो जूर दर बँक थारयता. फाटल्या तीन वर्सांत खयच्याच शेतकाराचें रीण माफ करूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
